Внимание!
Эта страница из архивного сайта. Информация может быть не актуальной.
Адрес нового сайта -
http://yantik.cap.ru/
Аслă Çĕнтерÿ 65 çул тултарнине халалласа ирттерекен мероприятисен планĕ тăрăх иртнĕ эрнере район пуçлăхĕ Н.Иванов Кармалти Н.Афанасьев палăкĕ умĕнче ирттернĕ митингра пулчĕ.
1943 çулти январĕн 29-мĕшĕнче Николай Афанасьев хăйĕн ÿчĕпе тăшман амбразурине хупланă, пирĕн салтаксене малалла кайма çул уçса панă. Çак паттăрла ĕçе тума комсомолеца Тăван çĕршыва чĕререн юратни хистенĕ.
Николай Афанасьев шкулта вĕреннĕ, колхозра ĕçленĕ. Вăрçă пуçлансан темиçе хутчен те хăйне фронта яма ыйтса çырнă. Унăн ĕмĕчĕ 1942 çулхи июль уйăхĕнче пурнăçланнă.
Историнчен çакă паллă: Николай Афанасьев фронтра малтанхи кунсенчех хăюлăх кăтартнă, ăна сержантсене хатĕрлекен шкула янă. Калинин облаçĕнчи Кондраково–Михалкино ялĕ патĕнче Н.Афанасьев взводне тăшманăн çĕр айне чавса вырнаçнă точкине пĕтерме хушнă. Тăшман пулемечĕ пĕр чарăнми пенине пăхмасăр пирĕн салтаксем атака хыççăн атака йĕркеленĕ, анчах малалла каяйман. Юлашкинчен пирĕн ентеш, аманнăскер, амбразура шăтăкĕ çине выртнă. Тан мар çапăçура паттăрлăх кăтартнăшăн Николай Афанасьева "вилнĕ хыççăн" Хĕрлĕ Çăлтăр орденпа наградăланă.
–Паттăрсем вилмеççĕ. Эпир вĕсене яланах асра тытатпăр. Эсир те, ачасем, хăвăрăн хăюллă ентешпе мăнаçланса, лайăх вĕренĕр, аслисен ырă йăлисене тытса пырăр, – тесе район пуçлăхĕ палăк умне чĕрĕ чечексем хучĕ.
Митингра район администрацийĕн тĕп специалисчĕ В.Чайкин, Тĕмер ял поселенийĕн ертÿçи Г.Иванов, шкул вожатăйĕ С.Шашкова Николай Афанасьев пурнăçĕнчи эпизодсемпе паллаштарчĕç. Шкул ачисем палăк умне чечек кăшăлĕ хучĕç.