08.11.2016 _ Ятлă-сумлă хĕрарăм

Тăвайри Синяковсен çемйинче пĕр-пĕрне хисеплесе, ăнланса та килĕштерсе пурăнаççĕ. Çак мăшăр пур ĕçе те шăкăл-шăкăл калаçса пĕрле тума хăнăхнă. Любовь Фирсовна кирек мĕнле ĕçре те вăр-вар, правур. Никам та калас çук ăна пенси çулне çитнĕ тесе. Пушă вăхăт тупăнсанах ал ĕçĕ тытать. Канмалла район хаçатне алла илет. "Пĕтĕмпех вуласа тухатăп. Çитес çула та çырăннă. Ĕçрисем пурте унпа туслă. Хăш-пĕр статйисене пĕрле те сỹтсе яватпăр", - терĕ Л.Синякова кăмăллăн.

35 çул тăрăшать вăл Тăвайри перекет банкĕнче. Ĕçленĕ хушăрах вĕренсе пĕлĕвне ỹстернĕ. Районта нумайăшĕ паллать ăна, çутă та илемлĕ сăн-питлĕ, клиентсене йăл кулăпа ăшшăн кĕтсе илекен хĕрарăма. Хăйĕн ĕçне лайăх пĕлнĕрен хăвăрт та пахалăхлă тивĕçтерет. Çапла, куллен миçе çынран: "Тавтапуç, ĕçĕрсем малашне те ăнса пыччăр", - тенине илтмест-ши аслă менеджер.

Перекет банкĕнче чылай тỹлеве терминалсем урлă пурнăçлатпăр. Кăткăсрах операцисем вăхăтĕнче яланах кунти ĕçченсем пулăшаççĕ. Халăха тивĕçтерекен "чỹречесем" патĕнчен те çын татăлмасть. Тинтерех ĕçе пуçăннисене пысăк квалификациллĕ специалистсем вĕрентсе пыраççĕ. Вĕсенчен пĕри - Любовь Фирсовна ĕнтĕ. Хастарлăхĕшĕн тĕрлĕ Хисеп хучĕсемпе чысланă ăна. Александр Краснов ертỹçĕ те мухтаса калаçрĕ, ăсталăхĕ, яваплăхĕ, çавăн пекех çынлăх туйăмĕ пысăккине палăртрĕ.

Çемйи те ялта ятлă-сумлă, ыттисемшĕн пур енĕпе те тĕслĕх. Хăйсен вăйĕпе кил-çурт çавăрнă. Хăнасене кунта яланах тарават.

Виçĕ пăхаттир пăхса ỹстернĕ. Çемьеленнĕ, хăйсем ашшĕ пулнă, вĕсемпе пĕрле куç тулли пилĕк мăнукне ура çине тăратма пĕтĕм вăй-халне параççĕ асламăшĕпе аслашшĕ.

Мăшăрĕ Георгий Валерьянович çар служби хыççăн "Сельхозхими" пĕрлешỹре водительте ĕçлеме пуçланă. Предприяти саланма пуçласан çурçĕре тухса кайса вахта меслечĕпе шоферах вырнаçнă.

Çар ретне тăричченех туслă пулнă вăл ялти маттур хĕрпе. Икĕ çул çырусем шăрçаласа вăхăт иртни сисĕнмен. Часах пĕр чăмăра пĕрлешсе йăва çавăрнă, район центрĕнче хваттер те панă вĕсене. Чи хаклă мул вырăнне упраççĕ вĕсем çав çырусене, иккĕшин пĕрле пĕр пысăк чăматана аран вырнаçнă. Хăть кĕнеке çырса кăлар вĕсенчен.

-Тепĕр чухне иксĕмĕр ларатпăр та вуласа çамрăклăха аса илетпĕр, - тенĕччĕ пĕринче çемье пуçĕ.

Синяковсем мал ĕмĕтпе хавхаланса утаççĕ пурнăç çулĕпе. Пур çĕре те ĕлкĕреççĕ, пурин валли те çитет вĕсен чун уççийĕпе ăшшийĕ. "Тăванран та тăван пирĕншĕн", - теççĕ телейлĕ мăшăр пирки тус-юлташĕсем. Яланах пулăшу аллине тăсма хатĕр Любовь Фирсовнапа мăшăрĕ. Чун канăçне юрăра тупаççĕ. Маларахри çулсенче концертсенче иккĕшĕ пĕрле юрлатчĕç. Уявсенче Георгий Валерьяновичăн аллинчен хуткупăс каймасть. Любовь Фирсовнан хитре те уçă сассине итлеме вара питех те кăмăллă.

Р.ВАСИЛЬЕВА.