11.10.2016 _ Хисеп хăми çинче

Авăн уйăхĕн вĕçĕнче Республика клиника больницин территорийĕнче "Золотой фонд здравоохранения Чувашии" Хисеп хăмине савăнăçлă лару-тăрура уçнă. Медицина ĕçченĕсене саламланă май, регион Пуçлăхĕ Михаил Игнатьев çамрăк специалистсем пултаруллă ĕçченсемпе танлашасса шаннине пĕлтернĕ.

Ĕç çыннин çулталăкĕнче сывлăх сыхлавĕн профессийĕнчи чи-чи лайăххисене чысласа виççĕмĕш стенд уçăлнине пĕлтернĕ Алла Самойлова министр. Ĕçри çитĕнỹсемшĕн республикăри 50 медицина учрежденийĕнчи 56 çынна кĕртнĕ унта. Хальлĕхе вара Чăваш Енĕн сывлăх сыхлавĕн "ылтăн фондĕнче" 140 медработник.

Хăйсен тивĕçĕсене чунтан парăнса туса пысăк хака тивĕçнисем хушшинче Тăвайри М.И.Никитина врач-фтизиатрпа Л.Г.Семенова фельдшер-лаборанта куратпăр. Кун-çулне пархатарлă профессипе çыхăнтарнă хĕрарăмсем обществăлла ĕçре те хастар, район пурнăçне хăйсен тỹпине хываççĕ.

Маргарита Ивановна медицинăра 42 çул вăй хурать. Ленинградри медицина институтне пĕтернĕ хыççăн тăван тăрăха килнĕ вăл. Леонила Геннадьевна 35 çул тỹрĕ кăмăлпа тăрăшать районти тĕп больницăра. М.Никитинапа Л.Семеновашăн кăçал ĕç чыславĕн çулталăкĕ тейĕн. Маргарита Ивановнана "Чăваш Республикин тава тивĕçлĕ врачĕ", Леонила Геннадьевнана "Чăваш Республикин сывлăх сыхлавĕн тава тивĕçлĕ ĕçченĕ" хисеплĕ ятсем панă, çак кунсенче вара Хисеп хăми çине кĕртнĕ.

Р.ВАСИЛЬЕВА.