23.09.2016 _ Ачасен сывлăхĕшĕн тăрăшакан

Елена Васильевна Назарова районти хисепе тивĕçлĕ врачсенчен пĕри. Пушкăрт патшалăх медицина институтĕнчен вĕренсе тухнă хыççăн Тăвайри тĕп больницăна ĕçлеме килнĕ Амалăх хĕрĕ. Унтанпа 30 çул ытла иртсе кайрĕ.

Участокри ача-пăча врачĕн ĕçне çăмăл тесе калаймăн. Каçхине те аптăраса ỹкнĕ ача патне чĕнсе илеççĕ. Уявра та, канмалли кун та пулăшу кĕтекен патне хыпаланса çула тухать тухтăр. Тимлĕ те ăшпиллĕ, чирлисен ыратăвне туйма пĕлекен, ĕçчен те харсăр çын, тесе хаклаççĕ ăна пĕрле ĕçлекенсем. Çул çинче чарса тăрсах ача амăшĕсем сĕнỹ-канаш ыйтнине те хăнăхнă вăл. Акă, паян кỹршĕ хĕрарăмĕ 1-мĕш класа каякан хĕрачине грипран прививка тутармалли йĕркепе интересленчĕ.

Тинтерех çут тĕнчене килнĕ пепкесем вара уйрăм тимлĕх ыйтаççĕ. Ашшĕ-амăшне вăхăтра прививка тутармалли çинчен асăрхаттарать участокри педиатр. Ỹт-пỹ тĕлĕшĕнчен мĕнле аталаннине сăнать. Хăш-пĕр ача амăшĕсем эрех ĕçни, туртни пăшăрхантарать шурă халатлă ĕçчене.

Елена Васильевна учительсен çемйинче çуралнă. Ашшĕпе амăшĕ, Василий Максимовичпа Ольга Николаевна Максимовсем, 5 ача пăхса ỹстернĕ, пурне те аслă пĕлỹ илме пулăшнă. Иккĕшĕ те пархатарлă пурнăç çулĕ утса тухнă. 40 çул шкул ĕçне панă Василий Максимович çĕре кĕнĕ ĕнтĕ. Фронтра яланах малти линире пулнă, темиçе хутчен аманнă, сипленнĕ те каллех çапăçăва кĕнĕ. Вăрçă суранĕсем сывлăхне хавшатрĕç пулĕ çав. Ольга Николаевна 35 çул ытла математика вĕрентнĕ. Чылай ачашăн ашшĕ-амăшĕ вырăнĕнче пулнă вĕсем. "Пирĕн юратнă учительсемччĕ", - тенине илтме пулать халĕ те Максимовсем пирки.

"Мĕн акатăн, çавă шăтать", - теççĕ. Ашшĕ-амăшĕн чун пуянлăхĕ ачисене куçнă. Пилĕк ачаран 3-шĕ сиплев ĕçĕн профессине суйланă. Зинаида Çĕнĕ Шупашкарта офис терапевтĕнче, Ирина Канашри хула больницинче участокри терапевтра вăй хураççĕ. Галинăпа Георгий инженер ĕçне кăмăлланă.

"Тĕнче ача сассипе илемлĕ", - тет виçĕ ача амăшĕ, район центрĕнче пурăнакан Елена Назарова. Мăшăрĕ вилсен пысăк лав тиенчĕ черченкĕ хĕрарăм çине. Чунĕ пăчăртаса ыратнине кăтартмарĕ, мал ĕмĕтлĕн малаллах талпăнчĕ. Ачисем амăшĕн çуначĕ айĕнче хăйсене çирĕп туйрĕç, шкултан лайăх паллăсемпе вĕренсе тухрĕç. Çав вăхăтрах ялта пурăнакан ватă амăшне те хăй хỹттине илчĕ вăл. Аслă ывăлĕ Ярослав - менеджер, МАДИнче вĕренсе диплом илнĕ. Алексей - çемьеллĕ, Мускаври агроинженери университетне пĕтернĕ, Шупашкарти "ЭКРА" предприятине ĕçе вырнаçнă. Максим - ЧПУн энергетика факультечĕн студенчĕ.

Е.Назарова ĕç ăсталăхне тăтăшах тĕрлĕ курссенче ỹстерет, çĕнĕ меслетсене алла илет, кăçал вара аслă категориллĕ врач пулнине çирĕплетрĕ. Район грамотисемпе, Чăваш Республикин сывлăх сыхлав Министерствин Тавĕпе чысланă ăна. Çемйи "Ял ĕçченĕ" хаçатпа туслă. Тепĕр çул валли çырăнма ĕлкĕрчĕç те ăна. Канмалли кун вара хăтлă хваттере хăна-вĕрле пуçтарăнĕ. Елена Васильевнана тивĕçлĕ канăва тухнă ятпа саламласа нумай ăшă сăмах калĕç.

Р.ШУМОВА.

Сăн ỹкерчĕкре: Е.В.Назарова иккĕмĕш ретре варринчи (çемье архивĕнчен).