Внимание!
Эта страница из архивного сайта. Информация может быть не актуальной.
Адрес нового сайта -
http://yantik.cap.ru/
Тăрмăшри культура çуртĕнче "Кино каçĕ" акци вăхăтĕнче киномеханикра нумай çул ĕçленĕ Зоя Петровна Малюковапа тĕл пултăмăр. Вăл Тăрмăш хĕрĕ, вăтам шкул хыççăн киномеханик профессине Саратов хулинче вĕренсе хамăр еннех ĕçлеме килет. Енĕш Нăрваш ялĕнчи клуба вырнаçать. Каярахпа Тăвайне ĕçлеме куçать.
Григорий Иванович Малюковпа мăшăрлансан Кемерово облаçĕнче амăшĕ пурăннă вырăнта тĕпленеççĕ. Унта та кино кăтартас ĕçре тăрăшнă, юратнă профессийĕнчен уйрăлман хĕрарăм. Анчах та чун тăван ялаллах туртнă. Кукашшĕ те, Петр Павлов вăрçă ветеранĕ, хăйне пăхма чĕннĕ, пĕччен пурăнма йывăрри пирки хыпарланă. Малюковсем 6 çул унта пурăннă хыççăн яла таврăнаççĕ, амăшĕ те пĕрле килет. Ашшĕ ку тĕнчерен уйрăлса кайнă пулнă ун чухне. Каллех юратнă ĕçне пуçăнать Зоя Петровна. Паллах, малтан киномеханике пулăшаканра, каярахпа киномеханикра ĕçлеме пуçлать, методист тивĕçне те тỹрĕ кăмăлпа пурнăçласа пырать. Юлашкинчен мĕн тивĕçлĕ канăва тухичченех Тăрмăшра вăй хурать.
Мăшăрĕн йăмăкĕ Юля, Юмансар ялĕнче пурăннă çамрăк хĕрарăм, сарăмсăр вилет, 5 ача тăлăха юлать. Ачасен ашшĕ икĕ çул маларах çĕре кĕнĕ пулнă. Григорий Ивановичпа Зоя Петровна икĕ хĕрачине усрава илеççĕ: асли Анжелика 12 çулта, кĕçĕнни Наташа 2 çулта. Икĕ ывăлне кукамăшĕпе Коля пиччĕшĕ ỹстерсе пурнăç çулĕ çине кăлараççĕ. Тепĕр хĕрне тăванĕсем Мурманск хулине илсе каяççĕ. Хăйсен ачисем пулманран, юратсах пăхнă хĕр пĕрчисене Зоя Петровна. 16 çул пĕрле лайăх пурăннă упăшки, йывăрлăхран хăраса, урăх хĕрарăм патне пурăнма тухса каять. Ачисем ăна атте тесех чĕннĕ пулнă. Пĕчченех пăхса çитĕнтерет мăшăрĕн йăмăкĕн хĕрĕсене Зоя аппа. Кукашшĕпе амăшне те чыслăн пăхса типтерлесе пытарать. Хĕрĕсем вĕренсе тухса çемьеленнĕ, мăнукĕсем те виççĕ, савăнать вĕсемпе кукамăшĕ. Кирлĕ вăхăтра яланах пулăшма килеççĕ, уявсемпе саламлаççĕ.
Ĕçне кура - хисепĕ: 2002 çулта Зоя Петровна "Раççей Федерацийĕн хисеплĕ кинематографисчĕ" ята тивĕçнĕ. Ун умĕн "Ĕçри хастарлăхшăн" медальпе, "Социализмла ăмăрту çĕнтерỹçи", ытти паллăсемпе чысланă. Ĕç стажĕ 35 çул унăн.
Е.МАТРОСОВА, культура ĕçченĕ.