Внимание!
Эта страница из архивного сайта. Информация может быть не актуальной.
Адрес нового сайта -
http://yantik.cap.ru/
Амалăх ялĕнче пурăнакан тата ял-йышра хисеп илнĕ Перасковья Федоровна Павлова 90 çула çитни çинчен хаçатра çырнăччĕ-ха. Ăна юбилейпе йышлăн саламларĕç. Раççей Президенчĕн саламлă çырăвне те çитерчĕç.
Район администрацийĕн пуçлăхĕн çумĕ - организациллĕ пай ертỹçи В.В.Чайкин Перасковья Федоровна хăйĕн ашшĕпе, Василий Егоровичпа, Амалăх шкулĕнче пĕрле ĕçленине аса илчĕ. Вăл хăй те ашшĕ çулĕпе утса алла диплом илнĕ хыççăн ĕç стажне çак шкулта пуçланă. Ашшĕ питĕ пултаруллăччĕ, ывăлĕ те çаплах пулĕ, тесе кĕтсе илнĕ ăна вĕрентекенсем. Чăн та, Валерий Васильевич пĕрремĕш Хисеп грамотине кунта ĕçленĕ чухне тивĕçнĕ.
Районти ветерансен Совечĕн председателĕ Р.А.Гурина хăйне шкулта вĕрентнĕ юбиляра çак шкултан пĕлỹ илнĕ мĕнпур çынсен ячĕпе саламларĕ, чылай хушă завучра та ĕçлени, ачасемпе ашшĕ-амăшĕ хушшинче пысăк авторитетлă пулнине çирĕплетрĕ.
Амалăхри шкула каярах ĕçлеме килнĕ, халĕ ялти ветерансен Совечĕн председателĕ Г.С.Перлова тата хĕрарăмсен Совечĕн председателĕ В.С.Майорова парнесем пачĕç, хăйсемшĕн аслă ăрури педагогсем ырă тĕслĕх пулнине палăртрĕç.
Çамрăк ăрурисен ячĕпе Чутей шкул директорĕ А.В.Гурина чун-чĕререн ыр сунса вĕрентекенсен ăшă саламне илсе çитерчĕ.
Çавăн пекех юбиляра чыслама район администрацийĕн халăха социаллă хỹтлĕх паракан пай начальникĕ Л.П.Аввакумова хутшăнчĕ, парнесемпе тата ăшă сăмахсемпе ватă çынна савăнтарчĕ, чĕрĕ чечексем парнелерĕ.
Тĕмер ял тăрăхĕн пуçлăхĕ Г.И.Иванов юбилейпе саламланă май Перасковья Федоровна ăс-тăнĕпе çирĕп, кăмăлĕпе ырă пулнишĕн савăнса калаçрĕ.
Чăнах та, пирĕн хаклă юбиляр хаçат-журнал вулама юратать. Пĕтĕм кил-çуртри, пахчари ĕçсене тума хутшăнать. Шкулта пĕрле ĕçленĕ О.Н.Максимова тата А.Е.Матвеева юрăсем те юрласа пачĕç. Саламлама килнĕ хăнасене пурне те чунтан тав турĕ хисеплĕ юбиляр.
А.МАТВЕЕВА.