04.03.2016 _ Вунă çул право хуралĕнче

Хĕрарăмсем хăйсен ĕçри ăсталăхне шанчăклăн çирĕплетсе тĕрлĕ сферăра ырă тĕслĕх кăтартаççĕ. Акă, право сыхлав органĕнчи ĕç-хĕл хĕрарăм ĕçĕ пек те туйăнмасть тата вăл преступленисене уçса парассипе тỹрремĕнех çыхăннă пулсан. Талăкăн кирек хăш вăхăтне, уява е канмалли куна пăхмасăр çула тухма, киревсĕр ĕç тăвакансемпе куçа-куçăн тăма тивет вĕсен.

Районти полици уйрăмĕнче 4 хĕрарăм тăрăшнине пĕлтерчĕ Вениамин Обаськин ертỹçĕ. Ольга Афонина дознаватель çинчен сăмах хускатсан ырă енчен кăна асăнчĕ. Шалти ĕçсен министерстви уйăхсерен ирттерекен февральти видеоконференци вăхăтĕнче дознани ĕçне пирĕн районта оперативлă, çỹллĕ шайра йĕркелесе пынине пĕлтерчĕ вăл.

Ольга Антонова (хĕр чухнехи хушамачĕ) шкулта вĕреннĕ чухнех кун-çулне милици ĕçĕпе çыхăнтарма ĕмĕтленнĕ. Вăтам шкула лайăх паллăсемпе пĕтернĕскер 2003 çулта Белгородри юридици институтне вĕренме кĕнĕ. Студент çулĕсенче те, шкулти пекех, обществăлла ĕçсенче пуçарулăх кăтартнă. Пĕрремĕш сессине ăнăçлă тытнă. Çакăн хыççăнах Анфиса Ивановнапа Игорь Алексеевич Антоновсем патне институтран çыру килнĕ. Ашшĕпе амăшне маттур хĕр пăхса ỹстернĕшĕн, тĕрĕс воспитани панăшăн тав туса çырнă унта. Сăмах май, Ольăн амăшĕ 33 çул районти тĕп больницăра стоматологи кабинетĕнче медсестрара тăрăшать, ашшĕ республика тулашне ĕçлеме çỹрет.

Диплом илнĕ пултаруллă специалист шалти ĕçсен районти пайне вырнаçнă. Хăйĕнчен аслă, опытлă çынсемпе пĕр чĕлхе тупса ĕçлеме пуçланă. 10 çул ытла иртрĕ те дознаватель ĕçне пуçăннăранпа. Штат хушса паманран лава пĕччен туртма тивет. Ĕç тиевне вара пĕчĕк тееймĕн. Киревсĕр çул çине мĕн илсе çитернĕ-ха йĕркене пăсакан? Ĕçе суда яриччен тимлĕн тĕпчемелле, ыйтусене тĕрлĕ орган представителĕсемпе çыхăнса татса пама, çынсен пулăшăвĕпе усă курма тивет.

Çапла, шаннă ĕçшĕн тỹрĕ чунпа, ответлăха туйса тăрăшнипе коллектив хисепне çĕнсе илнĕ. Ăнăçлă ĕçлесе пынăшăн дознани подразделенийĕсен сотрудникĕсем хушшинче "Професси тĕлĕшĕнчен чи лайăххи" ята тата III степеньлĕ Диплома тивĕç пулнă вăл. Шалти ĕçсен министерствин Хисеп грамотипе чысланă. Нумаях пулмасть вара О.Афонина капитана право ĕçĕнче хастар пулнăшăн III степеньлĕ "Пĕр кăлтăксăр службăшăн" медальпе наградăланă.

Районта 2015 çулта, умĕнхи çулхипе танлаштарсан, преступноç шайĕ чакнă. "Тишкерỹрен çакă та курăнать, преступлени тăвакансенчен ытларахăшĕ - ỹсĕр çынсем, - пăшăрханса калаçрĕ Ольга Игоревна. - Руль умне эрех ĕçсе ларнипе саккуна пăсаççĕ, çул-йĕр çинче хăрушсăрлăх кăларса тăратаççĕ".

Çак ыйтăва район хаçатĕнче те хускатать вăл. Ашшĕ-амăшĕпе нумай хваттерлĕ пĕр çуртра пурăнаççĕ пулин те икĕ çемйи те "Ял ĕçченĕ" хаçата çырăнса илет.

Çак яштака пỹ-силлĕ, сăпайлă та илемлĕ сăн-питлĕ хĕрарăма тахçантанпах пĕлетĕп. Темиçе çул каялла Афонинсем пирĕн подъездра хваттер туянса пурăнма пуçларĕç. Хĕрĕ те амăшĕ пекех типтерлĕхе юратать. Килĕнче хăтлă, чечексем илем кỹреççĕ. Киччĕри Николай Владиславовичпа çемье çавăрса хĕрпе ывăл çитĕнтереççĕ. Карина парта хушшине тинтерех кăна ларнă, Артем садике çỹрет.

Çуркуннехи илемлĕ уявпа саламласа право органĕн хастар ĕçченне ырлăх-сывлăх, çитĕнỹсем, лайăх кăмăл-туйăм сунас килет.

Р.ШУМОВА.

Сăн ỹкерчĕкре: О.И.Афонина.

Е.ШИБАЛОВ сăн ỹкерчĕкĕ.

АУ «РЕДАКЦИЯ ЯНТИКОВСКОЙ РАЙОННОЙ ГАЗЕТЫ «ЯЛ ĚÇЧЕНĚ» («СЕЛЬСКИЙ ТРУЖЕНИК») МИНИНФОРМПОЛИТИКИ ЧУВАШИИ