Внимание!
Эта страница из архивного сайта. Информация может быть не актуальной.
Адрес нового сайта -
http://yantik.cap.ru/
Полина Терешина - районти малта пыракан выльăх пăхакансенчен пĕри. Вăл хăйĕн хастарлăхĕпе ыттисемшĕн яланах ырă тĕслĕх пулнине палăртрĕ "Дружба" ЯХПК тĕп бухгалтерĕ Елена Михайловна ун пирки сăмах хускатсан.
Кĕрше ялĕнче çуралса ỹснĕ хĕр. Шкул хыççăн республика тулашне тухса кайнă. Иваново облаçĕнче те ĕçленĕ. Çемьеленнĕ. Шăпа тени çамрăк хĕрарăма ашшĕ-амăшĕн килне илсе таврăннă. Малтанхи çулсенче сыснасем пăхнă, каярахпа пăрусем пăхма вырнаçнă.
"Ферма ĕçне çăмăл тесе калаймăн. Ĕçе тĕрĕс йĕркелесе пырсан кашниех хăй вырăнĕнче тỹрĕ кăмăлпа ĕçлесен ỹсĕмсем пулаççех, - тет Полина Николаевна. -Пирĕн коллектив туслă, тăрăшуллă, продукци туса илессине çуллен ỹстерсе пыраççĕ хуçалăхра. Хăшĕсем чылай çул ĕçлеççĕ. Хам та тин кăна фермăналла утаттăм пекчĕ, чĕрĕк ĕмĕр иртсе те кайрĕ. Тăрăшсан, ялта та укçа ĕçлесе илме пулать. Çын çинче сумĕ те пур".
Чыс-хисеп тенĕрен, Полина Терешина пăру пăхаканăн та чыслав хучĕсем пĕрре кăна мар. Ял ĕçченĕсемпе продукци тирпейлекен промышленноçра ĕçлекенсен районти уявĕнче наградăна тивĕçнисем хушшинче Кĕршери ĕçчен хĕрарăм та пурччĕ.
Унăн ĕçри кăтартăвĕсем яланах пысăккине пĕлтерчĕç бухгалтеринчен. Хуçалăхра юлашки çулсенче ĕне выльăхсен йышĕ ỹссе пырать. Çамрăк пăрусен ỹт хушаслăхĕ лайăх.
Хăй суйласа илнĕ çулпа малаллах, мал ĕмĕтлĕн утать Полина Николаевна, виçĕ ача амăшĕ. Йывăрлăхсене парăнтарса хĕр пĕрчисене тивĕçлĕ воспитани парассине мала хурать. Аслисем çемье çавăрма та ĕлкĕрнĕ, кĕçĕнни шкулта вĕренет-ха.
х х х
"Дружба" хуçалăхри выльăх-чĕрлĕх пăхакансен хастар та аталануллă ĕçне район администрацийĕн АПК аталанăвĕпе экологи пайĕн тĕп специалисчĕ Елена Александровна Михайлова та палăртса хăварчĕ. Кăçал выльăх-чĕрлĕх ĕрчетес ĕçри кăтартусемпе районти сĕт-çу фермисем хушшинче пĕрремĕш вырăна тухнăшăн хуçалăха "Районти чи лайăх сĕт-çу фермин коллективĕ" куçса çỹрекен приз, райадминистрацин дипломне панă. Ĕнесен продуктивлăхĕ умĕнхи çулхинчен пысăкланнă. Паллах, çакăнта П.Терешина та хăйĕн тỹпине хывнă.
Р.ШУМОВА.
Первоисточник: АУ «Редакция Янтиковской районной газеты «Ял ěçченě» («Сельский труженик») Мининформполитики Чувашии