31.05.2016 _ Анлă лару иртнĕ

Тунтикунхи анлă ларăва ял тăрăхĕсен пуçлăхĕсем, район администрацийĕн пайĕсен начальникĕсем, ĕç тăвакан влаçăн районти уйрăмĕн тата федераллă, республикăри органсен ертỹçисем, коллективĕсене ертсе пыракансем хутшăннă.

Ăна район администрацийĕн пуçлăхĕ Владимир Ванерке ертсе пынă. "Районти юрă, ĕç тата спорт уявне (Акатуй-2016) çỹллĕ шайра ирттерме хатĕрленмелле юлнă кунсенче, - тенĕ Владимир Алексеевич. -Спорткомплекс, Тăвай ялĕн территорийĕсене тирпей-илем кĕртмелле. Масарсене те тимлĕхсĕр хăвармалла мар". Аса илтеретпĕр, районта Акатуй июнĕн 11-мĕшĕнче иртет.

АПК аталанăвĕпе экологи пайĕн начальникĕ Николай Краснов уй-хирти ĕçлĕ лару-тăрупа паллаштарнă.

Вĕренỹ учрежденийĕсенче экзаменсем пыраççĕ. Майăн 30-31-мĕшĕсенче вунпĕрмĕшсем вырăс чĕлхипе тĕрĕслев витĕр тухрĕç, тăххăрмĕшсем - математикăпа.

Çĕртме уйăхĕн пĕрремĕшĕнче шкулсем çумĕнчи лагерьсем ĕçлеме пуçлаççĕ. "Тăвай ен ачисен çуллахи каникулĕ усăллă, инкексĕр ирттĕр тесе тăрăшмалла пирĕн", - тенĕ вĕрентỹ пайĕн начальникĕ Олег Ломоносов.

Çĕртме уйăхĕн пĕрремĕш кунĕнче Тăвайри культура çурчĕ умĕнче "Сывă-и, Çулла!" уяв пулать, 11 сехетре пуçланать. Ăна Пĕтĕм тĕнчери ачасене хỹтĕлемелли куна халалланă.

Полици уйрăмĕн начальникĕн çумĕ Владимир Федоров, Тăвайри больницăн тĕп врачĕ Наталия Мефодьева, организаципе контроль тата информаципе тивĕçтерес ĕçсен начальникĕ Валерий Чайкин, район администрацийĕн пуçлăхĕн çумĕ - строительство, çул-йĕр, пурăнмалли çурт-йĕрпе коммуналлă хуçалăх ĕçĕсен начальникĕ Тамара Дьяконова, финанс пайĕн начальникĕ Александр Сергеев, районти выльăхсен чирĕпе кĕрешекен станци ертỹçи Александр Шакин, "Аль" спорткомплекс директорĕ Анатолий Кириллов харпăр хăй коллективĕсен ĕçĕ-хĕлĕ пирки тĕрлĕ информаци панă.

Н.ФЕДОРОВА.

АУ «Редакция Янтиковской районной газеты «Ял ěçченě» («Сельский труженик») Мининформполитики Чувашии