05.02.2016 _ Фотоконкурс малалла пырать

КУ ВĂХĂТ ТĔЛНЕ 1000 ЫТЛА ĔÇ ТĂРАТНĂ

Профессиллĕ тата ỹкерме юратакансен фотографи конкурсĕ Пĕтĕм Раççейри 2016 çулхи ял хуçалăх перепиçĕ умĕнхи информаци ĕçĕн йĕркипе иртет. 2015 çулхи июлĕн 1-мĕшĕнченпе "Манăн Раççей" конкурса çĕршывăн пур кĕтесĕсенчен, çав шутра Киров, Самара, Владимир облаçĕсенчен, Алтай крайĕнчен тата Чăваш Енрен уйрăмах нумай, сăн ỹкерчĕк ярса панă. Конкурс тĕллевĕ - ялăн хăйнеевĕр илемне, йăли-йĕркине тата унта пурăнакансен çитĕнĕвĕсене, ялхуçалăх ĕçĕн тивĕçлĕхне кăтартасси. Фотоконкурс тематикинче ял пейзажĕ (сухаланă уйсем, пучахри ыраш, садсем), ял хуçалăхĕнче вăй хуракан çынсен портречĕсем (дояркăсен, комбайнерсен, фермерсен), ял хуçалăх выльăхĕсене ỹкерни тата ытти те пулма пултарать. Ĕне - çур пурнăç, теççĕ. Вăл та ялти пурнăçа кăтартса паракан сăн ỹкерчĕкре паллă вырăн йышăнасса шанма пулать. Фотоконкурсра ялта нумай çул хушши чунне парса тата пысăк мăнаçлăхпа ĕçлекенсем те тĕп вырăн тупĕç. Конкурса ỹкерме юратакансем пурте хутшăнма пултараççĕ.

Конкурс итогĕсене 2016 çулхи июлĕн 1-мĕшĕнче - Пĕтĕм Раççейри ял хуçалăх перепиçĕ пуçланнă кун пĕтĕмлетеççĕ. Аса илтеретпĕр, ял хуçалăх перепиçĕ кăçалхи августăн 15-мĕшĕнче вĕçленет.

А.КАЛИСТРАТОВА.