20.11.2015 _ Мероприятисенчен пуян

Кăçалхи çу уйăхĕнче паллă поэтăмăр К.В.Иванов çуралнăранпа 125 çул çитрĕ. Çак çула Чăваш Енре Константин Иванов çулталăкĕ тесе палăртрĕç.

Тăвайри вăтам шкулта Иванов çулталăкне этнографи кĕтесĕнче уçрăмăр. Уява кашни класрах тĕплĕн хатĕрленчĕç. 5-7 класра вĕренекенсем "Нарспи" поэма сыпăкĕсене илемлĕ вуласа куракансене тыткăнларĕç. Фольклор кружокне çỹрекенсем илĕртỹллĕ ташăпа паллаштарчĕç. 8-11 классенче вĕренекенсем "Нарспи" поэмăн "Çимĕк каçĕ" (10 кл.), "Юмăç патĕнче" (8 кл.), "Атте-анне" (11 кл.) сыпăкĕсем тăрăх инсценировкăсем лартрĕç. Кĕçĕн класрисем аслă класра вĕренекенсем артист пек пулнинчен питĕ тĕлĕнчĕç. "Пирĕн шкула мĕнле артистсем килнĕ?" - текенсем те пулчĕç вĕсен хушшинче. Этнографи кĕтесĕнчи экспонатсемпе, ĕлĕкхи тумсемпе постановкăсенче вырăнлă усă курни те уява пуянлатрĕ.

"Нарспи" поэмăри "Çимĕк каçĕ" сыпăкĕпе районта конкурсра шкул чысне хỹтĕлесе 3-мĕш вырăн йышăнчĕç ачасем. Выляканĕсем Н.Александрова, А.Яковлева, М.Хумышев пулчĕç.

Литература çулне халалланă "Чĕрĕлĕх калчисем" районти вăйă-конкурс та К.В.Иванов ячĕпе иртрĕ. К.Автономов, Н.Петрова, А.Петрова, А.Лисова, Ю.Камасева, С.Козлова кунта та хăйсен пултарулăхне палăртма пултарчĕç. А.Лисова ỹкерессипе 1 вырăн йышăнчĕ.

Республикăра иртекен конкурссене те пирĕн шкул ачисем хастар хутшăнаççĕ. К.В.Ивановăн хайлавĕсене илемлĕ вулассипе Чăваш патшалăх педагогика университечĕ ирттернĕ "Чăваш поэзийĕн генийĕ" конкурсра Ангелина Петрова (7 "б" кл., сăн ỹкерчĕкре) 33 ача хушшинче 1-мĕш вырăна тухрĕ.

И.НИКОЛАЕВА. Тăвай шкулĕ.