18.09.2015 _ Упрар ăна ĕмĕрех

Чутейри вăтам шкулта ачасене чăваш чĕлхине юратма вĕрентеççĕ. Л.Михайлова вĕрентекен чăваш чĕлхи кружокне ертсе пырать. Унта çỹрекенсем тĕрлĕ темăпа калавсем, сăвăсем ăсталаççĕ, чăвашран тухнă паллă çынсемпе паллашаççĕ. Чăвашсен ĕлĕкхи пурнăçĕпе, вĕсен йăли-йĕркипе интересленеççĕ, районти краеведени музейне кайса кураççĕ. Шкулта ака уйăхĕнче чăваш чĕлхи кунне уявласси йăлана кĕнĕ. Чăваш çырулăхне пуçарса яракан И.Я.Яковлева асăнса тĕрлĕ мероприятисем ирттереççĕ. Пуçламăш класс ачисем те çак ĕçсене хастар хутшăнаççĕ. Яковлев çырнă калавсем тăрăх сценари туса выляççĕ. Чăваш Республикин ялавĕн историйĕпе паллашаççĕ. Çулла Республика кунне уявларĕç.

Чăваш чĕлхи - ăс-тăн çăл куçĕ. Савар чăваш чĕлхине. Упрар ăна ĕмĕрех.

З.ИВАНОВА. Чутей ялĕ.

Сăн ỹкерчĕкре: кĕçĕн классенче вĕренекенсем чăвашлăх уявĕнче.