Внимание!
Эта страница из архивного сайта. Информация может быть не актуальной.
Адрес нового сайта -
http://yantik.cap.ru/
Чăваш халăх художникĕ Моисей Спиридонович Спиридонов çуралнăранпа 125 çул çитрĕ. Çавна май Чăваш наци ỹнер музейĕнче Моисей Спиридоновичăн ỹкерчĕкĕсен выставки уçăлнăччĕ. Халĕ вара М.С.Спиридонов 1966_1981 çулсенче пурăннă тата нумай ỹкерчĕксем тунă, Шупашкарти Уруков урамĕнчи 15-мĕш номерлĕ çурт çине мрамортан ăсталанă асăну хăмипе Моисей Спиридоновичăн пăхăртан хатĕрленĕ барельефлă сăнне вырнаçтарнă. Асăну хăмине хамăр ентеш, Енĕш Нăрвашра çуралса ỹснĕ скульптор, халĕ И.Я.Яковлев ячĕпе хисепленекен Чăваш патшалăх педагогика университечĕн доценчĕ Василий Ананьевич Кузьмин калăпланă.
М.С.Спиридонов пурăннă виçĕ пỹлĕмлĕ хваттерте халĕ музей-хваттер йĕркеленĕ. Унта художникăн чылай ỹкерчĕкĕсене, вăл пуçтарнă чăваш тĕррисен пуххи, кил çуртри тĕрлĕ сĕтел-пукан, чылай документсемпе çырусем вырнаçтарнă.
Асăну хăмине уçнă самантра чи малтанах сăмах Чăваш культурипе, наци тата архив ĕçĕсен министрĕ В.П.Ефимов сăмах каланă. "М.С.Спиридонов Чăваш Республикинче ỹнер ĕçĕсене пуçарса яраканĕ, темле йывăр самантсенче те яланах тăван республикăрах ĕçленĕ, тĕрлĕ ỹкерчĕксем çырнă. Калăпăр, "Пузырист", "Невеста", "На строительстве Канашского ВРЗ", "В избе-читальне", "Трудовая Волга", "Март в Норвашах", "Автопортрет" тата ытти те", - терĕ Вадим Петрович.
Ун хыççăн Н.И.Садюков (М.С.Спиридонов хваттер-музей директорĕ), В.А.Кузьмин - асăну хăмин авторĕ, М.Г.Кондратьев - искусствоведени докторĕ тата ыттисем те тухса калаçнă.
Л.П.Григорьева - М.С.Спиридоновăн мăнукĕ. Вăл художник ĕçĕ-хĕлĕнчи, пурнăçĕнчи асра юлнă самантсем çинче чарăнса тăчĕ. Моисей Спиридоновичпа пĕр тăванĕн хĕрĕ О.И.Меркурьева сăмах каларĕ.
Юлашкинчен чи кĕтнĕ самант, асăну хăмине уçни. Ку хисеплĕ мешехене пурнăçлама В.А.Кузьмин авторпа Л.П.Григорьева тивĕç пулчĕç. Асăну хăмине уçсассăн пурте тăвăллăн алă çупрĕç, автора саламларĕç, асăну хăми умне чĕрĕ чечексем хучĕç.
Çавăн хыççăн асăну хăмине уçас çĕре хутшăнакансем М.С.Спиридоновăн хваттер-музейне кĕрсе унта вырнаçтарнă ỹкерчĕксемпе, унти экспозицисемпе тата тĕрлĕ экспонатсемпе паллашрĕç. Асăннă мероприяти çỹллĕ шайра иртрĕ.
В.ПЕТРОВ, Енĕш Нăрвашри музей заведующийĕ.