19.05.2015 _ Поэтпа мăнаçланса

Тĕмерти ача садĕнче К.В.Иванов çулталăкне халалласа чăвашла хитре вулакансен конкурсĕ иртнĕ. Галина Иванова библиотекарь малтанах чăвашсен поэт-классикĕн пурнăçĕпе, творчествăри ĕçĕ-хĕлĕпе, кĕнекисемпе паллаштарнă. Ачасем поэт çуралнă илемлĕ тавралăхпа, паллă вырăнсемпе унăн ỹкерчĕкĕсем тăрăх та пĕлме ăнтăлчĕç. Галина Павловна "Нарспи" поэма сыпăкĕсене вуларĕ. Уйрăмах çуркуннен асамлăхне сăнлани, Сентти çинчен çырса кăтартни тыткăнларĕ пĕчĕкскерсене.

Юратнă сăвăçпа мăнаçланать чăваш халăхĕ, вăл ĕмĕрсен асĕнче упранса тăрассине шансах тăратпăр. Акă, пĕр Шупашкар хулинчех К.В.Иванов ячĕллĕ Чăваш патшалăх академи драма театрĕ, библиотека, литература музейĕ, урам, унăн бюсчĕпе палăкĕ пур.

Садике çỹрекенсем "Нарспи" поэмăри сыпăксене, чăваш çыравçисем мухтавлă сăвăçа асăнса çырнă сăвăсене пăхмасăр каларĕç. Пултаруллисене жюри членĕсем - ачасен ашшĕ-амăшĕ _ палăртрĕ. Çĕнтерỹçĕсен йышĕнче -Ульяна Аксанова, Антон Краснов (1-мĕш вырăн), Олеся Зайцева, Ульяна Зайцева (2-мĕш вырăн), Даша Красновапа София Катякова (3-мĕш вырăн).

Мероприяти "Асанне" ятлă халăх вăййипе вĕçленчĕ.

Г.ИВАНОВА. Тĕмер ялĕ.

АУ «Редакция Янтиковской районной газеты «Ял ěçченě» («Сельский труженик») Мининформполитики Чувашии