2015.08.07 Ялта йĕрке — çĕршывра тулăх пурнăç

Пĕтĕм Раççейри ялхуçалăх çыравĕччен вăхăт пур-ха. Райхаçат редакцине çырав пирки тăтăшах ыйтусем килеççĕ. Ун çине Чăвашстатăн ялхуçалăх çыравне ирттерес тĕлĕшпе ĕçлекен Г. Иванова координатор хуравлать. Ялхуçалăх çыравне хăçан ирттереççĕ, унта кама тата мĕне шута илеççĕ? И. Иванов. Пĕтĕм Раççейри ялхуçалăх çыравĕ 2016 çулхи июлĕн 1-мĕшĕнчен тытăнса августăн 15-мĕшĕччен пырать. Унăн тĕллевĕ çĕршывра ялхуçалăх лару-тăрăвĕ епле пулни çинчен тулли те объективлă сведенисем пухасси пулса тăрать. Çак тапхăрта çырава хутшăнакансем “Ялта йĕрке — çĕршывра тулăх пурнăç” (“Село в порядке — страна в достатке”) пĕлтерĕше тĕпе хурса ĕçлеççĕ. Асăннă кампани ялсенче çеç мар, хуласемпе поселоксенче те иртет. Вăл ялхуçалăх таварĕ туса илекенсене —килти хушма хуçалăхсенчен, сад, пахча, дача юлташлăхĕсемпе пĕрлешĕвĕсенчен пуçласа фермер хуçалăхĕсемпе пысăк ялхуçалăх организацийĕсене пырса тивет. Сведенисем пухма хальхи вăхăтри çĕнĕ технологисене — Интернет урлă Росстатăн статистика информацин web системине, çавăн пекех планшетлă компьютерсене (унта переписчиксем респондентсен хуравĕсене çийĕнчех вырнаçтараççĕ) усă кураççĕ. Çавăнпа çыравра переписчиксен йышĕ нумаях кирлĕ пулмасть, кунпа пĕрлех вĕсен ĕçĕн пахалăхĕ тата оперативлăхĕ ỹсет. Ку çыравра уйрăм çĕнĕлĕхсем пулаççĕ — респондентсен “Ялхуçалăх организацийĕсем хуçалăха тытса пыма малта пыракан мелсене, вĕсем хăйсен кулленхи ĕçĕнче кредитсемпе усă курни, бюджетран уйăракан субсидисемпе дотацисене илни” ыйту çине хуравлама тивет. Çакна каласа хăвармалла: ыйтусен хуравĕнче ят-хушамата палăртмаççĕ. Çыравăн малтанхи кăтартăвĕсене 2017 çулхи IV, тĕп кăтартусене 2018 çулхи юлашки кварталта пĕлтереççĕ. Çырава хатĕрленнĕ май çак кунсенче ăна халалланă уйрăм мероприятисем иртеççĕ. Акă, июлĕн 1-мĕшĕнчен “Манăн Раççей” фотоконкурс старт илчĕ. Вăл 2016 çулхи апрелĕн 30-мĕшĕччен пырать. Унта 18 çул тултарнă профессионалсемпе сăнỹкерчĕк тума юратакансем хутшăнма пултараççĕ. Призсен пĕтĕмĕшле фончĕ 150000 тенкĕпе танлашать. Хатĕр ĕçсене (вĕсем çине “Конкурс любительской фотографии”, “Конкурс профессиональной фотографии” тесе палăртмалла) электронлă почтăпа foto@vshp2016 ярса памалла. Июлĕн 1-мĕшĕнчен Пĕтĕм Раççейри ялхуçалăх çыравĕн пресс-центрĕн сайчĕ ĕçлеме пуçларĕ. Унта çырава хатĕрленсе тăвакан çĕнĕ ĕç-хĕл пирки пĕлме, çырав программипе, унăн хучĕсен формин макечĕпе, нормативлă документсемпе, ытти материалсемпе паллашма пулĕ.