2015.08.11 Хатĕрленỹ ĕçĕсем планпа килĕшỹллĕн пыраççĕ

Пĕтĕм Раççейри ялхуçалăх çыравне хатĕрленес ĕçсем Росстатăн тата Чăвашстатăн календарлă планĕсемпе килĕшỹллĕн малалла пыраççĕ. Акă, августăн 1-мĕшĕ тĕлне çырав ыйтăвĕсемпе ĕçлекен уполномоченнăйсен, кашни муниципалитет йĕркелĕвĕнчех ĕçлекен списоксем тăвакан специалистсен, вырăнти хăйтытăмлăх органĕсен представителĕсен пĕрлехи вăйĕпе çырав объекчĕсен хисепĕ пирки информацисем, кунпа пĕрлех хула округĕсемпе хула поселенийĕсенчи граждансен килти хушма хуçалăх тата граждансен коммерцилле мар пĕрлешĕвĕсен (сад, пахча тата дача) çырав объекчĕсен списокне хатĕрленĕ. Халĕ муниципаллă мĕнпур йĕркелỹсенче çав списоксене тĕрĕслес ĕç пырать. Ку чухне Чăвашстат даннăйĕсен базипе, çав шутра иртнĕ çырав материалĕсемпе те, ытти çăлкуçсен информацийĕсемпе тишкерсе танлаштараççĕ. Граждансен коммерцилле мар сад, пахча тата дача пĕрлешĕвĕсен списокне йĕркеленĕ чухне уйрăм йывăрлăхсем тухса тăчĕç. Малтан шутланă тăрăх, çыравăн 731 объектĕнче участоксен хисепĕ 138022. Ку енĕпе çырав ыйтăвĕсемпе ĕçлекен район шайĕнчи уполномоченнăйсем пысăк ĕç туса ирттерчĕç: информаци çăлкуçĕсене палăртрĕç, председательсен телефонĕсене, администрацисем коммерцилле мар пĕрлешỹсене çĕр участокĕсем уйăрни çинчен калакан йышăнусене шыраса тупрĕç, вĕсенче ĕçленине палăртма вырăнсенче пулчĕç. Çырав объекчĕсен списокне тĕрĕсленĕ тапхăрта тĕрлĕ çăлкуçсенче информацине туллин тишкернĕ, списока икĕ хутчен кĕнĕ объектсене унтан кăларнă, ячĕсене улăштарнă ял тăрăхĕсен адресĕсене тепĕр хут тĕрĕсленĕ. Ял тăрăхĕсенче информацин тĕп çăлкуçĕ хуçалăх учечĕн даннăйĕсем пулса тăнă. Мĕнпур район ял тăрăхĕсенчи граждансен списокĕсене вăхăтра тăратнă, вĕсене тĕрĕслесе сиктерсе хăварнă лицевой счетсене, хушаматсене, адрессене хушнă. Çĕр участокне сутнă, анчах уйри участоксем тата çĕр пайĕсем унчченхи хуçасенчех юлнă уйрăм хуçалăхсен кăтартăвĕсене çырса хатĕрленĕ чухне нумай ыйту тухса тăнă. Пĕр ялта пурăнакан, анчах ытти ял тăрăхĕсен территорийĕнче çĕр пайне илнĕ граждансен даннăйĕсене çырнă чухне те çаплах килсе тухнă. Çĕнетнĕ списоксене халĕ Чăвашстатăн штатра тăман службин специалисчĕсем тĕрĕслеççĕ, йăнăшсене, йĕкĕреш-объектсене палăртса тỹрлетеççĕ. Кăçалхи сентябрĕн 1 —15-мĕшĕсенче хула округĕсенчи, хула поселенийĕсенчи тата граждансен коммерцилле мар пĕрлешĕвĕсенчи килти хушма хуçалăхсенче талккăшпе тĕрĕслев ирттереççĕ. Граждансен сад, пахча, дача коммерцилле мар пĕрлешĕвĕсен çĕр участокĕсен схема-планĕсем пурринчен регистраторсен ĕç эффективлăхĕ нумай килет. Хальхи вăхăтра Чăвашстата муниципаллă районсенчи ялхуçалăх организацийĕсем малтанхи даннăйсене тăратаççĕ. Район шайĕнчи специалистсем ялхуçалăхĕн мĕнпур таварĕ туса илекенсен ялхуçалăхĕнче усă куракан çĕр участокĕсем пуррине тĕрĕслеççĕ. Халĕ ĕçлекен ялхуçалăх организацийĕсен çĕр участокĕсен лаптăкĕсене хăйсем патĕнчех палăртаççĕ, вĕсем урăх районсен территорийĕнче вырнаçнă пулсан, тỹрлетỹсем кĕртеççĕ. Пĕтерсе хунă предприятисен ĕçĕн номерĕсене, конкурс производстви вĕçленнин датине Арбитраж судĕнче палăртаççĕ. Ялхуçалăх организацийĕсем, çырав объекчĕсем пулнă май, çырав хучĕсене хăйсемех çыраççĕ. Çавăнпах производствăн тĕп хатĕрĕ — çĕр пирки информацине малтанхи тапхăртах тĕрĕслемелле, çав шутра Чăваш Ен Ялхуçалăх министерствипе муниципаллă йĕркелỹсен администрацийĕсен специалисчĕсем хутшăннипе те. Çырав умĕн пур шайра та информаципе ăнлантару ĕçне вăйлатни кирлĕ. Июлĕн 15-мĕшĕ тĕлне ку енĕпе республика-район-хула хаçачĕсенче 53 информаци пичетлесе кăларнă. Ку енĕпе малалла та тĕллевлĕн ĕçлесе пымалла. Август-сентябрь уйăхĕсенче, калăпăр, регистраторсем çырав объекчĕсенче ĕçленине Чăвашстат специалисчĕсен комментарийĕсемпе çутатса памалла.