Эльпуçĕнчи вулавăшра

Эльпуçĕнчи вулавăшра «Хозяюшка» кружок ĕçлеме пуçланăранпа кĕçех виçĕ çул çитет. 2015 çулта йĕркелесе янă ăна. Э. Филиппова библиотекарь йĕркелесе пырать ĕçсене. Тĕрлĕ ăсталăха алла илеççĕ кружока çÿрекенсем. Пĕрле пухăнса хăйсем çыхнă, тĕрленĕ, ăсталанă япаласене пĕр-пĕрне кăтартаççĕ, вĕрентеççĕ. Пĕр-пĕринпе калаçса, канашласа ĕçлеççĕ вĕсем.  Эльвира Витальевна тĕрлĕ журналтан, интернетран ÿкерчĕксем, схемăсем тупса парать. Эрнере икĕ кун ялти маттур хĕрарăмсем занятисене пухăнса ал-ĕç ăсталăхне  хăнăхаççĕ. Чи пултаруллисене асăнса хăварас килет: Федорова Мария, Егорова Надежда, Игнатьева Надежда, Цыкляева Роза, Керимова Алефтина, Дмитриева Лидия, Алексеева Валентина, Шумитова Людмила, Егорова Тамара, Иванова Зинаида. Пĕр-пĕринчен ыррине вĕренни вара çав тери лайăх.

         Кашни çулах хĕрарăмсен праçникĕ  умĕн ятарлă курав тусах хăйсем ăсталанă япаласемпе паллаштараççĕ. 2016 çулта акă çыхнă чечексен куравне «Цветочная фантазия» йĕркелерĕç. Куравра çĕкелпе çыхнă чечексем куçа илĕртрĕç: кĕлчечексем, глоксинисем, каллăсем, гвоздикăсем, ромашкăсем тата ыт. те. 2017 çулта çĕкелсемпе çыхнă салфеткăсен куравне йĕркеленĕ. Кăçал та курав йĕркелесшĕн.

         Ал ăстисем  вулавăшра иртекен мероприятисене те хаваспах хутшăнаççĕ, хаçат-журнал, кĕнеке  нумай вулаççĕ. Уйрăмах Алексеева Валентинăпа Лидия Димитриевăна палăртса хăвармалла.