2011.03.24 Палӑк тума - хӑйсен тӳпине (Хыпар)

Чӑваш Республикин вӑрҫӑ, ӗҫ, хӗҫ-пӑшаллӑ вӑйсен тата право хуралӗн органӗсен ветеранӗсен /пенсионерсен/ общество организацийӗн А.Г.Николаев космонавтӑн скульптура композицине хатӗрлесе вырнаҫтарма халӑхран укҫа пуҫтарасси ҫинчен пӗлтернӗ хыпар Шупашкар районӗнчи Ҫырмапуҫ ял тӑрӑхӗн администрацийӗ ҫумӗнчи Иккассинчи ветерансен канашне хавхалантарнӑ. Виҫӗ ялти - Иккасси, Платка, Шаккӑл - 48 ҫын сӑваплӑ ӗҫе хастар хутшӑнса кӗске вӑхӑтрах 5700 тенкӗ пухнӑ, ӑна уйрӑм счет ҫине куҫарнӑ.

- Ватӑсене нумай ӳкӗтлеме тивмерӗ, - пӗлтерчӗ канаш ертӳҫи А.Михайлов. Сӑмах май, Александр Михайлович хӑйӗн пенсийӗнчен 500 тенкӗ хывнӑ. - Тӑван халӑхӑмӑрӑн мухтавлӑ ывӑлне ӗмӗр асӑнса пурӑнма тӑвакан палӑк валли кашниех хӑй мӗн чухлӗ пултарнӑ таран тупе хывма тӑрӑшрӗ. Марковсем, Вениамин Михайловичпа Сергей Вениаминович, 500 тата 300 тенкӗ пачӗҫ. Вӗрентекенсем, ветлечебницӑра, почтӑра, мед-пунктра, лавккара тӑрӑшакансем те пуҫаруран аякра юлмарӗҫ.

А. Степнов