Шупашкарта А.Г.Николаева чысласа лартнӑ палӑк пулать текен хыпар савӑнтарса та ҫунатлантарса ячӗ. Тавах республикӑмӑр пуҫлӑхӗ-сене ҫак сӑваплӑ ӗҫе пуҫарса янӑшӑн! Палӑкӗ кӑна уҫлӑх уҫнӑ Андрияна тивӗҫ пултӑрччӗ.
А.Г.Николаев палӑкне эпӗ вӑл космоса вӗҫнӗ «Восток-3» караппа пӗрле кӑна куратӑп. Музейре ӗҫленӗ чухнех ҫак карапа Шупашкара кӳрсе килсе пьедестал ҫине хӑпартса лартас кӑмӑлӑм пурччӗ. Андриян Григорьевичпа хӑйӗнпе те калаҫнӑччӗ кун пирки, «Восток-3» карап макетне те пулин Шупашкара кӳрсе килме май ҫук-ши тесе унран пулӑшу та ыйтнӑччӗ. Шутсӑр сӑпайлӑ ҫынччӗ те вӑл: «Аван мар апла, халӑх тем калӗ. Шуршӑлта мӗн пурри те ҫителӗк-лех», - терӗ ун чухне.
А.Г.Николаев палӑкне хӑйне таҫта ҫӳле хӑпартса ларттарас килмест манӑн. Ҫынни ытла хамӑр пек ҫӗр ҫинчискерччӗ вӑл. Ҫавӑнпа та Андриян кӗлеткине ҫӗр ҫинчех курас килет. Аса килсен пырса калаҫма пултӑр. Паллах, палӑк «космос металӗнчен» - титанран - пулмалла пек туйӑнать. Эпӗ ӑна Н.В.Овчинников картини ҫинчи манерлӗ куратӑп: тин кӑна уҫлӑх уҫса аннӑ та вӑл - улӑх варринче тӑрать. Скафандрпа, гермошлемпа... Ҫамрӑк чухнехи Андриян... Пӗрремӗш вӗҫевӗ хыҫҫӑн.
Хыҫалта, ҫӳллӗ пьедестал ҫинче, «Восток-3» космос карапӗ ҫуталса ларать.
Палӑк еплерех пуласси, паллах, скульпторсемпе архитекторсен ӑсталӑхӗнчен килет.
Ман куҫа курӑнакан палӑк питӗ Атӑл хӗррине, чӑнкӑ ҫырана ӑнтӑлать. К.Иванов урамӗпе Атӑл хысакӗ хушшинче хитре вырӑнсем пур. Строительство материалӗ-сен заводне хуларан кӑларса ун вырӑнне парк уҫма палӑртнӑ тенине те илтнӗ. Атӑл хысакӗ тӑрӑх ҫӗнӗ ҫуртсем лартса тухма ҫук - ҫыран йӑтӑнса анма пултарать. Ҫавӑнпа архитекторсем Атӑл ҫыранӗ тӑршшӗпех сквер проектлаҫҫӗ. Андриян палӑкӗ валли ҫавӑнта вырӑн тупсан аван пулассӑн туйӑнать. Атӑл ҫинчен пӑхатӑн та - Шупашкар ҫинче космос карапӗ тӳпене тӗллесе тӑрать!.. Вӑйлӑ вӗт, э?.. Атӑл тӑрӑх иртен-ҫӳрен пӑхса-курса тӗлӗнсе тӑтӑр: тӗнче уҫлӑхне уҫнӑ виҫҫӗмӗш ҫын чӑваш пулнине курса-пӗлсе кайтӑр.
Вӗр ҫӗнӗ Правительство кер-менӗнчен оперӑпа балет театрӗ еннелле пӑхсан ӑнӑҫсӑр ятлӑ Шыв пӑрӑхурамӗ/«Водопроводная»/ярт тӑсӑлса выртать. Ҫав урам вӗҫӗнче, аслӑ Атӑл хӗрринче, тӗнче уҫлӑхне ҫул уҫнӑ «Восток-3» космос карапӗ ҫиҫсе тӑрать. Ун умӗнчи уничере /скверта/ асран кайми Андриян тӑрать.... Йӗри-тавра чечек... Улӑх чечекӗ... Хамӑрулӑхра ӳсекенни...
«Ҫапла пултӑр!» темелли ҫеҫ юлать.
Николай Егоров
профессор.
Шупашкар хули