Раҫҫей Федерацийӗн Патшалӑх Думин депутачӗ Н.Бударин космонавт Канашра ӗҫлӗ ҫул ҫуревпе пулнӑ. Чи малтанах вӑл хула администрацийӗн пуҫлӑхӗпе Р.Мясниковпа калаҫнӑ. Родион Алексеевич хӑнана Канашӑн социаллӑ пурнӑҫ тата экономика аталанӑвӗпе паллаштарнӑ.
Чылай шкулта ҫамрӑк космонавтсен отрячӗ пур. Вӗсем космонавтика музейӗсене ҫӳреҫҫӗ, Пӗтӗм Раҫҫейри олимпиадӑсене хутшӑнса малти вырӑнсене йышӑнаҫҫӗ. Хулари библиотекӑсенче космос темипе куравсем, презентацисем, видеоуроксем тата ытти мероприяти йӗркеле-нет.
Канашри 6-мӗш вӑтам шкулӑн конференц-залне кадетсем тата ҫамрӑк космонавтсен отрячӗсен хастарӗсем пухӑнчӗҫ. Вӗсем .Бударинпа, хула администрацийӗн ӗҫӗсене йӗркелесе тӑракан А.Кавтазеевпа тата шкул директорӗпе М.Димитриевпа тёл пулчӗҫ, космонавта халалланӑ презентаципе паллашрӗҫ.
Николай Михайлович космонавтсен йывӑр та нумай енлӗ ӗҫне сӑнлакан документ фильмне кӑтартрӗ. Ачасем ӑна кӑсӑклансах курчӗҫ. Н. Бударин тӗнче уҫлӑхӗнче виҫӗ хутчен пулнӑ. Унпа пӗрле француз, американ вӗҫнӗ. Калаҫу вӑхӑтӗнче вӑл шӑпӑрлансен ыйтӑвӗсене хуравларӗ. Хӑна хуларй ҫамрӑк космонавтсен отрячӗсен ӗҫӗ-хӗлӗпе те интересленчӗ. Ҫакӑн ҫинчен Ача-пӑча пултарулӑх ҫурчӗн методисчӗ Е.Волкова тӗплӗн каласа кӑтартрӗ.
- Ҫамрӑк тусӑмсем! Лайӑх вӗренӗр, кружоксене, секцисене ҫуреме тӑрӑшӑр, пӗлӗве тарӑнлатӑр, тавра курӑма анлӑлатӑр, сывӑ пурнӑҫ йӗркине пӑхӑнӑр, спортран ан ютшӑнӑр, - терӗ Николай Михайлович тӗл пулу вӗҫӗнче. Космос улӑпӗ хисеплӗ хӑнасен кӗнекинче ӑшӑ сӑмахсем ҫырса хӑварчӗ.
Патшалӑх Думин депутачӗ Канашри интернат шкула та ҫитсе курчӗ, хула администрацийӗнче ҫамрӑксемпе тӗл пулчӗ. Сӑмах Раҫҫей космонавтикин хальхи тапхӑрӗ, космонавтсен отрядне лекмелли условисем ҫинчен пычӗ.
Виталий Ачча