Кăçалхи кăрлач уйăхĕнче “Пĕтĕм Раççейри ача-пăча фончĕн” пирĕн республикăри уйрăмĕн йĕркелÿ комитечĕ “Ачалăх ячĕпе, ачалăхшăн” ыр кăмăллăх марафонĕ ирттересси çинчен пĕлтерчĕ. Ашшĕ-амăшĕн хÿттисĕр юлнă ачасене пĕтĕм йышпа кар тăрса кăçалхипе вун улттăмĕш çул пулăшатпăр, вĕсен шăпине çăмăллатма тăрăшатпăр ĕнтĕ.
Кăрлачăн 22-мĕшĕнче вара Чăваш хутлăхĕнче пархатарлă ĕç вăй илчĕ. Сăваплă акцие пуринчен малтан ЧР Президенчĕ Михаил Игнатьев хăйĕн тÿпине хыврĕ: коррекцин 2-мĕш шкулĕнче вĕренекенсем валли ортопедин ятарлă сĕтел-пуканĕ туянмашкăн 130 пин тенкĕлĕх сертификат парнелерĕ. Республикăмăр ертÿçин алли çăмăл пулчĕ. Унăн тĕслĕхĕпе хавхаланса “Ачалăх ячĕпе, ачалăхшăн” марафона малтанхи кунах укçа хывакансем йышланчĕç. Яланхи пекех ыр кăмăллăх акцийĕнче РФ Патшалăх Думин çĕр-шывсен хушшинчи ĕçсен комитечĕн председателĕ К.Косачев ырă тĕслĕх кăтартрĕ: Константин Иосифович марафон пухмачне депутатăн пĕр уйăхри шалăвне куçарни çинчен пĕлтерчĕ, “АККонд” АУО, “Эверест” АХО генеральнăй директорĕсем Валерий Ивановпа Николай Герасимов - 100-шер пин, ЧР Патшалăх Канашĕн комитет председателĕ Николай Малов 101 пин тенкĕ куçарчĕç, ”Спорт вăййисен оборудованийĕн завочĕ” АХО генеральнăй директорĕ Григорий Васильев коррекцин асăннă шкулне вăйă хатĕрĕсен пуххипе савăнтарчĕ..
Палăртма кăмăллă: марафона хутшăнакансен йышĕ çулран-çул ÿссе пырать. Виçĕм çул, сăмахран, ача-пăча фончĕн счечĕ çине унта хутшăннă 903 предприяти-организаци тата уйрăм çын - 6652253, пĕлтĕр 1285-ĕн 7211842 тенкĕ куçарнă. Çав укçа-тенке йĕркелÿ комитечĕ ача çурчĕсене, интернат шкулсене, ĕçлесе воспитани паракан колонисемпе ятарлă шкулсене, çул çитменнисен сиплев учрежденийĕсене тĕрлĕ енлĕ пулăшма, медицина оборудованийĕ, эмел, тренажер туянма, культура мероприятийĕсем йĕркелеме, уйрăмах пултаруллă çамрăксене стипенди пама уйăрать. Пĕлтĕр, сăмахран, çав шутран “Ача-пăча диабечĕ”, “Ача-пăча церебраль параличĕ”, “Онкогематологи” программăсене пурнăçламашкăн Республикăри ача-пăча клиника больницине - 400 пин, хевтесĕр ачасемпе çул çитмен çамрăксен реабилитаци центрне, Сĕнтĕрвăрри тата Пăрачкав районĕсенчи пĕчĕккисен медицина учрежденийĕсене 140-шер пин тенкĕ панă. Ниме мелĕпе кăçалхи ыр кăмăллăх акцийĕнче пухăнакан нухрат та пархатарлă тĕллевсене пурнăçлама хывăнасси иккĕлентермест.
“Ачалăх ячĕпе, ачалăхшăн” марафон пухмачне пуянлатас тĕллевлисем вара сахал мар. Акă Шăмăршă район администрацийĕнче вăй хуракансем хăйсен пĕр кунхи шалăвне - 7628 тенкĕ - куçарнă. Вĕсен Улатăрти ĕçтешĕсен тÿпи вара - 11086 тенкĕ.
Вĕренекен çамрăксем те ырă ĕçе пуçаруллă хутшăнаççĕ: ЧППУ, Чăваш ял хуçалăх академийĕн, Шупашкарти экономикăпа менеджмент институчĕн, Социаллă университетăн, ШĔМĕн Чулхулари акдемийĕн, М.А. Шолохов ячĕллĕ Мускав патшалăх гуманитари университечĕн Шупашкарти филиалĕсен, Шупашкарти экономикăпа технологи колледжĕн, Апатлану технологийĕпе коммерци техникумĕн, 18, 23-мĕш професси училищисен студенчĕсем унта 64 пин тенкĕ хыврĕç. Шупашкарти Ленин районĕнчи студентсен ассоциацийĕн хастарĕсем çывăх вăхăтрах “Малютка” ача çуртне çитсе концерт кăтартма, пĕчĕкскерсене парнепе савăнтарма тĕв тунă.
Марафон пĕтĕм халăх ними пулнине тĕпе хурса “Чăваш-Мед” АУО ĕçченĕсем пухмача 66623,62 тенкĕлĕх пуянлатрĕç. “Ачалăх ячĕпе, ачалăхшăн” акципе килĕшÿллĕн Етĕрнери ачасен пултарулăх керменĕпе çемьесене социаллă пулăшу паракан центр йышлă çемьесенче çитĕнекенсене, хевтесĕрсене - кăрлач уйăхĕнче çуралнисене - уява йыхравларĕç, парнесемпе чысларĕç, юрă-ташăпа савăнтарчĕç. Кунашкал вун-вун тĕслĕх илсе кăтартма пулать. Общество ачалăхпа çыхăннă ыйтусене манманнине çирĕплетет çакă. Патшалăхăмăр хăйĕн çамрăк гражданĕсен пурнăçĕпе çыхăннă стратегиллĕ пысăк пĕлтерĕшлĕ мероприятисем валли çуллен пин-пин тенкĕ уйăрнине пăхмасăр марафонта пухнă нухрат тата пахарах, мĕншĕн тесен бюджет шучĕпе килмен вăл, йывăр шăпаллă ачасене пулăшас тĕллевпе ентешĕмĕрсем чун хавалĕпе пус çумне пус хушса пуçтарнă, çапла вара тăван республикăмăрăн малашлăхĕ пирки шухăшланă.
Раççей Федерацийĕн Президенчĕ Д.А.Медведев РФ Федераци Канашне янă Çырура çакна уйрăммăн палăртнă: “Пирĕн çĕр-шывра никамăн та мар ачасем пулмалла мар”. Ку сăмахсен пĕлтерĕшне Чăваш Енĕн кашни çынни ăша хывса сăваплă акцие пуçаруллă хутшăнасса шанас килет.“Хыпар” хаçат вулаканĕсене эпир те ырă ĕç тума васкамашкăн чĕнетпĕр. Укçана Пĕтĕм Раççейри ача-пăча фончĕн регион уйрăмне - вăл Шупашкарти Петров урамĕнчи 7 çуртра вырнаçнă, тел.:62-89-42 - е марафон счечĕ çине куçарма юрать. Унăн реквизичĕсем:
Получатель:
ЧРО ООБФ “Российский детский фонд”
ИНН 2128005408
КПП 213001001
Р/СЧ 40703810075220160067
В ЧУВАШСКОМ ОСБ /8613 Г. ЧЕБОКСАРЫ
БИК 049706609
К/СЧ 30101810300000000609
Назначение платежа: Благотворительный взнос в марафон “Именем детства, во имя детства”.
Валентина Смирнова