22-мĕшĕнче ЧР Президенчĕ М.Игнатьев пĕтĕмĕшле пĕлÿ паракан коррекцин ятарлă 2-мĕш шкулĕнче пулса йăлана кĕнĕ «Ачалăхшăн, ачалăх ячĕпе» ыр кăмăллăх марафонĕ уçăлнă ятпа йĕркелÿ комиссийĕн ларăвне хутшăнчĕ. Михаил Игнатьев - унăн çум председателĕ.
Чи малтанах Президент сусăр ачасен дистанци вĕренĕвĕн республикăри центрĕн ĕçĕ-хĕлĕпе паллашрĕ. Çĕнĕ подразделени калаçма тата утма, тĕрлĕ хускану тума кансĕр çамрăксене килтен тухмасăрах пĕлÿ илме май парать - центра компьютер, телекоммуникаци тата ятарлă оборудованипе, программăпа тивĕçтернĕ, сусăрсен тата педагогсен ĕç вырăнĕсене интернетпа çыхăнтарнă. Çĕнĕ технологисем пулăшнипе 10 ача ку хутĕнче республика ертÿçипе хутшăнма тата центрта пулса иртнипе видеоконференци çыхăнăвĕн мелĕпе паллашма пултарчĕ.
Ун хыççăн Михаил Игнатьев «Ачалăхшăн, ачалăх ячĕпе» марафон йĕркелÿçисене, ыр кăмăллăх акцийĕн халĕчченхи тусĕсене тата унта пуçласа хутшăнма кăмăл тунисене саламларĕ. Пархатарлă ĕçрен РФ Патшалăх Думин ют çĕр-шыв ĕçĕсен комитетне ертсе пыракан Константин Косачев та пăрăнмарĕ.
«Пирĕнпе юнашар пулăшăвăмăра кĕтекен сахал мар. Вăраха ямасăр, атьăр-ха, ыр кăмăллăн вĕсене хÿтĕлер. Пĕрлехи вăйпа эпир ăш пиллĕ ĕçсем чылай тума пултаратпăр», - терĕ республика ертÿçи коррекцин 2-мĕш шкулне ортопедин ятарлă сĕтел-пуканĕ туянмашкăн 130 пин тенкĕлĕх сертификат панă май.
Çакна палăртма кăмăллă: марафона хутшăнакансен йышĕ те, пухмача пуянлатакан взноссен сумми те çулсерен ÿссе пырать. 2010 çулта акцие 1285 предприяти-организаци хăйсен тÿпине 7211842 тенкĕлĕх хывнă. Çав укçапа ача çурчĕсене, интернат шкулсене, воспитанипе ĕç колонийĕсене, ятарлă шкулсене, ача-пăчан сиплев учрежденийĕсене васкавлă социаллă пулăшу панă, медицина оборудованийĕ, эмел, ятарлă тренажер туянма, культура мероприятийĕсем ирттерме, республикăри уйрăмах пултаруллă çамрăксене стипендипе тивĕçтерме пулăшнă.
Кăçал марафон пухмачĕ ăна уçнă пĕрремĕш кунранах пуянланма тытăнчĕ - Константин Косачев депутат хăйĕн уйăхри шалăвне унăн счечĕ çине куçарчĕ, «Акконд» АУО тата «Эверест» АХО генеральнăй директорĕсем Валерий Иванов тата Николай Герасимов - 100-шер пин тенкĕлĕх сертификатсем пачĕç, ЧР Патшалăх Канашĕн экономика политикипе агропромышленноç комплексĕн тата экологи комитечĕн председателĕ Николай Малов 101 пин тенкĕ хыврĕ. «Вăйă спорчĕн оборудованийĕн завочĕ» АХО генеральнăй директорĕ Григорий Васильев коррекцин 2-мĕш шкулне вăйă оборудованийĕн пуххине парнелерĕ.
Михаил Игнатьев Президент марафонăн йĕркелÿ комитечĕн членĕсене республикăри муниципалитетсен представителĕсемпе кăçалхи нарăс уйăхĕнче ирттерекен ĕçлĕ тĕл пулусенче пулăшмашкăн сĕнчĕ. «Çапла майпа ырă ăнтăлăва республика çыннисене ытларах хутшăнтарма май килĕ. Хамăрăн тĕслĕхпе эпир ентешсен чунĕнче яваплăх тата хĕрхенÿ туйăмĕсене хĕмлентерме тивĕç, - палăртрĕ Президент. - Вĕсем те ыр кăмăллăх акцине чĕрепе йышăнса хăйсен тÿпине хывассине мала хуччăр».
В. Смирнова