Чӑваш Ен Пуҫлӑхӗ Михаил Игнатьев ертсе пынӑ канашлура Шупашкар хулине никӗсленӗренпе 550 ҫул тата Чӑваш автономи облаҫне йӗркеленӗренпе 100 ҫул ҫитнине халалланӑ юбилей мероприятийӗсене хатӗрленсе ирттерессипе ҫыхӑннӑ ыйтусене пӑхса тухнӑ.
Ларӑва Раҫҫей Патшалӑх Думин депутачӗсем Алена Аршиновӑпа Руслан Тихонов, ЧР Патшалӑх Канашӗн Председателӗ Юрий Попов, Патшалӑх строительствин, вырӑнти хӑй тытӑмлӑх, Регламент тата депутат этикин комитечӗн председателӗ -«Пӗрлӗхлӗ Раҫҫей» политика партийӗн Чӑваш регион уйрӑмӗн политика канашӗн секретарӗ Николай Малов, ЧР экономика аталанӑвӗн, промышленноҫ тата суту-илӳ министрӗ Алексей Табаков, культура, национальноҫсен ӗҫӗсен тата архив ӗҫӗн министрӗ Вадим Ефимов, Шупашкар хула пуҫлӑхӗ Леонид Черкесов хутшӑннӑ. Вӗсем уяв мероприятийӗсене хатӗрленсе ирттерессипе, республикӑри промышленноҫ, энергетика, ял хуҫалӑх, транспорт, вӗренту тата культура объекчӗсене юсаса ҫӗнетессипе ҫыхӑннӑ ыйтусене сӳтсе явнӑ.
Ҫавӑн пекех юбилей мероприятийӗсене йӗркелекен комитет йышне пӑхса тухнӑ, ӑна юпа уйӑхӗн 28-мӗшӗччен ҫирӗплетмелле. Михаил Игнатьев Чӑваш Енӗн Раҫҫей Патшалӑх Думинчи депутачӗсене ку ӗҫе хастартарах хутшӑнма, федераци Правительствипе тачӑрах ҫыхӑну тытма ыйтнӑ, мӗншӗн тесен Раҫҫей Президенчӗн Хушӑвӗнче республикӑра икӗ юбилее уявлассине палӑртнӑ. Кун пекки сайра пулать.
Канашлӑва пӗтӗмлетсе республика Пуҫлӑхӗ министрсене тата тӗп хула ертӳҫине юсаса ҫӗнетмелли объектсен тулли списокне, уяв мероприятийӗсен малтанхи планне хатӗрлесе ҫитерме хушу панӑ.
■ И.СЕРГЕЕВА