ТАСС пӗлтерни
1962 ҫулхи ҫурла уйӑхӗн 11-мӗшӗнче Мускав вӑхӑчӗпе 11 сехет те 30 минутра Совет Союзӗ Ҫӗр орбитине "Восток-3" космос карапне вӗҫтерсе кӑларнӑ. "Восток-3" карапа Совет Союзӗн гражданинӗ, космонавт летчикӗ Андриян Григорьевич Николаев майор юлташ тытса пырать.
Вӗҫев тӗллевӗсем:
- космос вӗҫевӗн условийӗсенче этем организмне мӗнле витӗм кӳнине тӗрӗслесси;.
- йывӑрӑшсӑрлӑх условисенче этем ӗҫлеме пултарассине тӗпчесси; :
- космос вӗҫевӗ вӑхӑтӗнче ӑслӑлӑх тӗпчевӗсене ирттересси;
- космос карапӗсен тытӑмӗсене, ҫыхӑну тытмалли, карапа тытса пымалли тата ҫӗр ҫине антарса лартмалли хатӗрсене тӗрӗслесе пӑхса лайӑхлатасси.
"Восток-3" карап-спутника палӑртнӑ орбитӑна кӑларнӑ. Малтан палӑртнӑ тӑрӑх вӑл ҫӗр тавра 88,5 минутра, Ҫӗртен чи ҫывӑхра чухне /перигей/ - 183 тата чи аякра чухне /апогей/ 251 километрта вӗҫсе ҫаврӑнать. "Восток-3" космос карапӗпе тытакан икӗ енлӗ ҫыхӑну ҫирӗп.
Николаев космонавт летчик пӗлтернӗ тӑрӑх тата телеметрипе телекурав тытӑмӗсен кӑтартӑвӗсемпе килӗшӳллӗн Андриян Григорьевич карапа орбитӑна кӑларнӑ тата йывӑрӑшсӑрлӑха куҫнӑ тапхӑра аван чӑтса ирттернӗ. Николаев юлташӑн хал туйӑмӗ аван.
Николаев космонавт летчик тӗнче уҫлӑхӗнчи хыпарсене 20,006 тата 143,625 мегагерц частотапа пӗлтерсе тӑрать. Карапра 19,995 мегагерц частотапа ӗҫлекен "Сигнал" передатчик вырнаҫтарнӑ.
Космос карапӗн борт тытӑмӗ аван ӗҫлет. Вӗҫев малалла мӗнле пынине Совет Союзӗнчи мӗн пур радио-станци пӗлтерсе тӑрӗ.
Стар умӗн А.Г.Николаев космонавт каланинчен
Хисеплӗ юлташсем! Хаклӑ ҫыннӑмӑрсем!
Нумаях пулмасть кӑна хамӑн юлташӑмсене - Юрий Гагаринпа Герман Титова - ҫӑлтӑрлӑ рейса ӑсатрӑм, паян вара космоса ҫӗнӗ ҫул хывма мана шанса пысӑк чыс турӗҫ. Ҫакӑншӑн Ленин партийӗн Тӗп Комитечӗпе Совет правительствине чӗререн тав тӑватӑп, ҫак хисепе тӳрре кӑларас тӗллевпе пӗлӗве, вӑй-халӑма шеллемӗп.
Манӑн ӗҫтешӗмӗрсен пӗрремӗш вӗҫевӗсем Коммунистсен партийӗ ертсе пынипе совет халӑхӗ тунӑ пысӑк ӳсӗмсем мӑнаҫ туйӑмсем вӑратрӗҫ.
Пирӗн парти Совет Ҫоюзӗпе пӗтӗм этемлӗх ырлӑхӗшӗн космоса тӗпчессине мирлӗ тӗллевпе туса пырӗ. Космоса тепре вӗҫни ҫав ырӑ тӗллевсене ҫирӗплетет те.
Чипер юлӑр, хаклӑ ҫыннӑмӑрсем!
Тӑван совет ҫӗрӗ ҫинче тӗл пуличчен!
Н.С.Хрущев "Восток-3" космос карапӗн бортне янӑ радиограмма
Николаев юлташа!
Хисеплӗ Андриян Григорьевич!
Сирӗн радиограммӑна пысӑк туйӑмпа вуласа тухрӑм.
Пӗтӗм Совет ҫӗр-шывӗ сирӗн вӗҫеве хумханса тата мӑнаҫланса сӑнать. Халӑх тата парти сирӗнпе мухтанать. Сирӗн паттӑрлӑх, "Восток-3" космос карапӗн вӗҫевӗ пирӗн патшалӑхӑн, унӑн ӗҫчен те талантлӑ ҫыннисен, пирӗн ӑсчахсен, инженерсен, техниксен, рабочисен, колхозниксен ят-сумне ҫӗклеҫҫӗ.
Сирӗн сасса илтме тата телевизор экранӗ ҫинче сирӗн сӑнӑра курма питӗ хавас пулчӗ. Пирӗн тӗлӗнтермӗш техника эсир космосра Ҫӗртен питӗ аякра чухне те сире питӗ ҫывӑх курма май парать. Эсир юнашарах пулнӑн туйӑнчӗ, Эпир сирӗн хаваслӑ сассӑра илтрӗмӗр, сирӗн ҫиҫекен куҫӑра, алӑсен хусканӑвне куртӑмӑр, эсир мӗнле ӗҫленине сӑнарӑмӑр, хӑвӑра аван туйнӑшӑн савӑнтӑмӑр.
Эсир ҫӗр тавра тӑваттӑмӗш хут вӗҫсе ҫаврӑннӑ чухне эпӗ сирӗнпе калаҫрӑм. Сирӗн тата нумай ҫаврӑм тума тивет. Хисеплӗ Николаев юлташ, сире вӗҫеве ӑнӑҫлӑ вӗҫлесе ҫӗр ҫине ырӑ-сывӑ таврӑнма сунатӑп. Ҫирӗп сывлӑх, ырӑ кӑмӑл-туйӑм сунатӑп.
Эпӗ тата манӑн юлташсем - Тӗп Комитет Президиумӗн тата правительство членӗсем - сире кӗҫех тӑван совет ҫӗрӗ ҫинче ытама илессе шанатпӑр.
Н.ХРУЩЕВ
1962 ҫулхи ҫурла уйӑхӗн 11-мӗшӗ. '