2012.06.26 Пӗчӗккисене - парне (Хыпар)

Ҫу уйӑхӗн 23-мӗшӗнче тӗп хулан «Волжский-З» микрорайонӗнче пурӑнакан ашшӗ-амӑшӗ В.Соколов урамӗнче туса лартнӑ ҫӗнӗ ача сачӗн картишӗнче пуҫтарӑнчӗ. Ăна уҫма асламӑшӗ-кукамӑшӗ те пынӑ. Кунтах - ҫурта хӑпартнӑ строительсем те. Уява хутшӑннисем республика Пуҫлӑхне Михаил Игнатьева, Раҫҫей Федерацийӗн Патшалӑх Думин депутатне Алена Аршиновӑна, федерацин тӗп инспекторне Геннадий Федорова ӑшшӑн кӗтсе илчӗҫ.

200-мӗш номерлӗ «Эрудит» ача садне савӑнӑҫлӑ лару-тӑрура уҫма республика Пуҫлӑхне Михаил Игнатьева сӑмах пачӗҫ.

«Эпир паян Шупашкарта куллен 215 ача йышӑнакан, хӑтлӑхӗпе ашшӗ-амӑшӗ ыйтнине тивӗҫтерекен ача садне ӗҫе кӗртетпӗр, - терӗ вӑл. - Шкул ҫулне ҫитменнисене пӗчӗккисен учрежденийӗпе тивӗҫтерессипе малашне те ӗҫлӗпӗр. Виҫӗ ҫулта ашшӗ-амӑшӗн пур ыйтӑвне те татса парӑпӑр».

Михаил Игнатьевпа Алена Аршинова садике ҫӳреме пуҫлакансене парне пачӗҫ. Хӗрлӗ хӑйӑва кассан хӑнасем шала кӗрсе строительсен ӗҫне пахаларӗҫ. Кунта бассейн та пур. Кашни ачана ишме вӗрентӗҫ. Шӑпӑрлансем ҫӑвӑнса тасалмалли пӳлӗмсемпе усӑ курӗҫ. Ҫывӑрмалли пӳлӗмсенче ҫӗнӗ краватьсем лартнӑ. Минтер-утиялпа, сӗтел-пуканпа тивӗҫтернӗ. Ачасене ӑс пама, выляма, сывлӑха ҫирӗплетме мӗн кирли пурте хатӗр.

Строительсем кунти ачапчана аван парнепе савӑнтарнӑ. Ҫывӑх вӑхӑтрах республикӑра ҫакӑн йышши темиҫе садик уҫма палӑртнӑ.

Сергей СЕРЕГИН.