Акатуй – чăвашсен чи пысăк уявĕ. Сумлă çак уявра халăх çулсерен ĕлĕкех савăннă. Çапла майпа чăвашсем çĕр ĕçне хисепленине, çĕнĕ вăрлăх акнине, çĕнĕ пурнăç пуçланине палăртнă.
Çĕртме уйăхĕн 24-мĕшĕнче – Республика кунĕнче – тĕп хулари «Шупашкар: 500 çул» паркра пĕтĕм чăвашсен Акатуйĕ кĕрлĕ. Уяв Чăваш наци конгресĕпе Шупашкар хула администрацийĕн пуçарăвĕпе тăваттăмĕш хут иртĕ, республикăри тата диаспорăри йăхташсене пуçтарĕ.
– Кăçал Акатуйра çĕнĕлĕхсем пулĕç. Уяв анлăрах иртĕ: 4-5 пин çын килессе кĕтетпĕр. Беларуçран, Самар, Эрĕнпур, Пенза облаçĕсенчен, Тутар Республикинчен хăнасем çитĕç. Районсем те Акатуя хутшăнĕç. Уява илемлĕрех ирттерме тăрăшăпăр. Чăвашсен çурт-йĕрĕн куравĕ вăйлăрах пулĕ. Турисем – хăйне евĕр, анатрисем вара вăрман çывăхнерех вырнаçнă май пуянрах пурăнаççĕ. Вĕсем тĕрлеме те ытларах юратаççĕ, – терĕ Чăваш наци конгресĕн президиумĕн членĕ Валерий Лукьянов.
Акатуй яланхи пекех чăвашсен авалхи йăли-йĕркипе – Чÿкпе – уçăлĕ. Унтан вăйă картине тăрĕç, чăваш халăх юрри «Алран кайми аки-сухи» янăрĕ. Уява фольклор ушкăнĕсем хутшăнĕç, хăйсен пултарулăхĕпе паллаштарĕç. Унсăр пуçне Акатуя çитнисем спорт ăмăртăвĕсенче вăй виçĕç: кире пуканĕ йăтĕç, волейболла вылĕç... Спортсменсем наци кĕрешĕвĕнче те тупăшĕç. Уяв программине мини футбол та кĕртнĕ.
Пĕчĕккисем паркра чуччупа ярăнĕç, батут çинче сикĕç. Уявра наци апат-çимĕçне тутанса пăхма май пулĕ. Ку кăна мар, пирĕн республикăра пурăнакан ытти халăх пĕрлешĕвĕсен представителĕсем хăйсен кухнипе паллаштарĕç. Вĕсем янтăланă тутлă апат-çимĕçпе те сăйланма май килĕ.
– Акатуй хăнасен, куракансен кăмăлне каясса, вăл çулран-çул аталанасса шанас килет, – терĕ Валерий Лукьянов.
Уяв 11 сехетре пуçланать. Пурне те ăшă кăмăлпа кĕтеççĕ.
Ирина АЛЕКСЕЕВА.