2012.04.25 Чĕре хушнипе (Хресчен сасси)

Тавăшкассинчи культурăпа кану центрĕ районти агитбригадăсен смотр-конкурсне хутшăннă. Уява Раççей историйĕн çулталăкне халалланă. Тавăшкассисем вăйă, кĕвĕ-çемĕ йĕркипе хатĕрленĕ «Истори арчи» сценкăна выляса панă. Ăна Çĕрпÿ районĕ йĕркеленнĕренпе 85 çул çитнине халалланă. Сăмах май, асăннă тăрăхра çулталăка ăнăçлă ирттерсе ярас тесе ятарлă план туса хатĕрленĕ. Çавна май шкулсенче, вулавăшсенче кăçал Тăван çĕршывăн 1812 çулхи вăрçине, Бородино çапăçăвне, П.Столыпинăн 150 çулхи юбилейне, Аслă Петĕр патша çуралнăранпа 340 çул çитнине халалланă мероприятисем иртеççĕ. Çавăн пекех Ираида Вдовинăна асăнса «Чĕре хушнипе, кăмăл туртнипе» каç та пулĕ. Çавăн пекех ăслăлăх конференцийĕсем, музыкăпа литература композицийĕсем, ÿкерчĕксен конкурсĕсем, куравсем йĕркелеме палăртнă.

Шăмăршă районĕнчи çамрăксем вара Раççей историйĕн çулталăкĕнче «Манăн Раççей» конкурсра тупăшĕç. Вăл февраль-май уйăхĕсенче виçĕ тапхăрпа иртет. Çемье, йăх-ăру çинчен çырса кăтартĕç вĕсем. Унсăр пуçне тăван тăрăх çинчен сăн ÿкерчĕксен мультимедиллĕ презентацине хатĕрлĕç. Чи лайăх ĕçсем регионсен хушшинче иртекен «Манăн Раççей» пултарулăх конкурсне хутшăнĕç.

Валентина ПЕТРОВА.