2012.02.06 Истори музейран пуçланать (Хыпар)

Йĕпреçри этнографи музейĕнче ĕçлекенсем Раççей Президенчĕ Дмитрий Медведев ку çула Истори çулталакĕ тесе пĕлтерсенех мероприятисен планне çирĕплетрĕç. «Кăçал тăван районта та истори пĕлтерĕшлĕ пулăм нумай, - тет музей директорĕ Александр Майоров. - Авăн уйăхĕнче района йĕркеленĕренпе 85 çул çитет. Çавна май «Тăван тăрăхăн талпануллă утамĕсем» экспозици уçасшăн.

Ку çулталăк Йĕпреçсемшĕн кунта 110 çул каялла чиркÿ уçнипе, ун çумĕнче пĕр ĕмĕр каялла вырсарни шкулĕ ĕçлеме пуçланипе, легендăна кĕрсе юлнă Алексей Маресьев Йĕпреçри вĕçев шкулĕнче «иккĕмĕш çунат» туяннăранпа 70 çул çитнипе паллă.

Истори çулталăкне халалласа ирттерекен мероприятисене музей дирекцийĕ Тăван çĕр-шывăн Аслă вăрçин ветеранĕсене, паллă ентешсене, педагогсемпе тавра пĕлÿçĕсене анлăн явăçтарма палăртнă.

Г. Васильев.