2011.10.28 Анна Алексеевнăпа курнăçни - асрах (Çамрăксен хаçачĕ)

Андриян Николаев космоса виççĕмĕш парăнтарса пĕтĕм чăваш халăхне çÿле çĕкленĕ. Андриян Григорьевич пин-пин ачашăн кумир пулнă. Эпир те шкулта унăн ырă тĕслĕхне тĕпе хунă. 5-мĕш класра вĕреннĕ чухне пирĕн отряд «правофланговый» ята çĕнсе илнĕччĕ. Уншăн пире паллă ентешĕмĕрĕн тăван тăрăхне кайма тÿлевсĕр экскурси йĕркелесе пачĕç. Унтанпа 31 çул иртрĕ пулин те Шуршăл асрах. Музейре пулни те, унти экспонатсемпе паллашни те - куç умĕнчех. Чи асра юлмалли самант - виççĕмĕш космонавтăн амăшĕпе Анна Алексеевнăпа курнăçни. Пире вăл килĕ умĕнче тарават кĕтсе илчĕ, ывăлĕн ачалăхĕ, космоса вĕçни çинчен каласа кăтартрĕ. «Андриян сирĕн пек ачах пулнă. Тĕнче уçлăхне хăпарма мĕн пĕчĕкрен ĕмĕтленнĕ», - тени паян кун та хăлхара янăрать. Сыв пуллашас умĕн вăл шкулта лайăх вĕренме сунчĕ. Çакăн пек çул çÿреве илсе кайнăшăн класс ертÿçине З.Алешевăна чунран тав тăвас килет.

Халĕ хам та шкулта ĕçлетĕп. Чăваш халăхĕн чысĕпе мухтавĕн, наци паттăрĕн кун-çулĕпе паллашма 8-мĕш класра ăс пухакансемпе Шуршăлти мемориал комплексĕнче пултăмăр. Чи малтанах Космонавтика музейĕнче ентеш кун-çулĕпе çыхăннă сăн ÿкерчĕксемпе, кĕнекесемпе, тĕрлĕ материалпа, ятарлă тумтирпе, апат-çимĕçпе паллашрăмăр. Пĕрремĕш вĕçев хыççăн Андриян Николаева Шупашкарта кĕтсе илнĕ автомашинăран ачасем тĕлĕнчĕç. Пĕр вырăнлă «Восток» карапăн кабинине, телескопа, планетарие тата ытти экспоната курма май килни, паллах, питĕ паха. Ачасем музейре çĕннине чылай пĕлчĕç. Çав шутра - чаплă ентешĕмĕрĕн тава тивĕçлĕ ĕçĕсене Раççейĕн тата ют çĕр-шывсен вун-вун наградипе палăртнине, вăл нумай-нумай хулан хисеплĕ гражданинĕ пулнине, 75 ăслăлăх ĕçĕ çырнине... Космонавтсем асăнмалăх лартнă чăрăш, кедр, туя, улмуççи çумĕнче сăн ÿкерĕнтĕмĕр. Чаплă ентешĕмĕрĕн ачалăхĕ иртнĕ çурта кĕрсе куртăмăр. Кил хуçалăхĕнче тытмалли хатĕр-хĕтĕр тирпейлĕ те тап-таса упраннинчен тĕлĕнтĕмĕр. Ун хыççăн часавая çитрĕмĕр. Андриян Николаева çуралса ÿснĕ тăрăхра, Шуршăлта, пытарни лайăх. Чăвашсен йăли çапла-çке. 2004 çулхи утă уйăхĕн 3-мĕшĕнче чаплă ентешĕмĕр вилнине пĕлсен куççуле чараймарăм.

Çул çÿреве ял çывăхĕнчи стела патĕнче вĕçлерĕмĕр. Çÿл тÿпенелле кармашакан асамлă ракетăна чылайăшĕ тытса пăхма тăрăшрĕ. Чăваш ятне çăлтăрсен çÿллĕшне çĕкленĕ Андриян Николаевăн тăван тăрăхĕнче пулни ачасен асĕнче нумайлăха юлĕ.

Надежда КОШЕЛЕВА.

Патăрьел районĕ,

Аслă Чемен вăтам шкулĕ.