2011.07.08 Андриян пиччене асӑнса (Çамрăксен хаçачĕ)

Ҫичӗ ҫул каялла, 2004 ҫулхи утӑ уйӑхӗн 3-мӗшӗнче, паллӑ ентешӗмӗрӗн, Совет Союзӗн икӗ хут Геройӗн Андриян Николаевӑн, чӗри тапма чарӑннӑ. Ҫакна асра тытса Шуршӑлти мемориал комплексӗнче Асӑну кунӗ иртнӗ. Ир-ирех хурлӑхлӑ юрӑсем янӑранӑ. Иван Христофоровӑн "Вӗҫ, вӗҫ куккукне" те илтме май пулнӑ. Ку - Андриян Григорьевичӑн чи юратнӑ юрри. Пӗр минут шӑп тӑнӑ хыҫҫӑн ачасемпе ҫамрӑксене экскурсие йыхравланӑ, "Чӑваш Енӗн ҫӑлтӑрлӑ кӑйкӑрӗ" фильм кӑ-тартнӑ.

Унччен маларах, иртнӗ эрнере, Сӗнтӗрвӑрринче хӑйне евӗр акци йӗркеленӗ - унта пурӑнакансем "Андриян Николаев ҫулӗпе" велочупӑва тухнӑ. Пулас космонавт хӑй вӑхӑ-тӗнче, вӑрман техникумӗнче вӗреннӗ чухне, Шуршӑлтан кашни кун ҫуран ҫӳренӗ, киле те улӑх-ҫаран илемӗпе киленсе утнӑ. Шӑпах ҫакна манмасӑр Сӗнтӗрвӑррисем велосипед ҫине ларнӑ. Пулас "ҫӑлтӑр" такӑрлатнӑ ҫул тӑрӑх ярӑннӑ. Пӗрремӗш хут ирттернӗ мероприятире Ҫӗнӗ Шупашкарти "Йӗпсе ҫинчи хӗвел" клуб ертӳҫи Вячеслав Платонов районта велочупуҫӑсен клубне йӗркелеме, ӗҫе, вӗренӳ учрежденине   велосипедпа  ҫӳреме  сӗннӗ.