Пурӑннӑ пулсан чӑваш халӑхӗн паттӑр ывӑлӗ А.Николаев кӑҫал 82 ҫул тултармаллаччӗ. Хӑйӗн ҫуралнӑ кунӗнче, сентябрӗн 5-мӗшӗнче, тӗп хулара ун ячӗпе палӑк уҫрӗҫ. Ӑна Шупашкарти М.Калинин урамӗпе А.Николаев космонавт урамӗ хӗресленнӗ ҫӗре вырнаҫтарнӑ. Палӑка уҫма ЧР Президенчӗ Михаил Игнатьев, космонавтӑн хӗрӗ Елена Терешкова тата ытти сумлӑ хӑнасем хутшӑнчӗҫ.
Уява Шупашкар хула пуҫлӑхӗ Леонид Черкесов уҫрӗ. Малашне кунта парк пуласса пӗлтерчӗ вӑл. Ҫавӑн пекех космос техники те, ытти космонавт бюсчӗсем те пулӗҫ.
Ашшӗне сума суса ҫакнашкал палӑк ҫӗклеме пултарнӑшӑн Елена Андрияновна чӑваш халӑхне чун-чӗререн тав турӗ. «Атте Чӑваш Ене юрататчӗ, май пур таран ентешӗсене пулӑшма тӑрӑшатчӗ. Ҫак юратӑва ман чӗрене те вырнаҫтарнӑ вӑл. Халӗ ку туйӑмпа эпӗ хамӑн ачасене ӑс паратӑп», - терӗ Е.Терешкова. Сӑмах май, вӑл ҫак кунах ЧР Президенчӗпе тӗл пулнӑ, ҫавӑн пекех Шупашкарти А. Николаев ячӗллӗ 10-мӗш вӑтам шкула, Шуршӑлти Асӑну комплексне ҫитсе курнӑ. Ҫамрӑк космонавтсемпе, ӗҫченсемпе курса калаҫнӑ.
Республика ертӳҫи те калаҫӑвне тав сӑмахӗпе пуҫларӗ. Ниме меслечӗпе пухнӑ укҫапа палӑк ҫӗклеме пултарнишӗн хавхаланчӗ, сӑваплӑ та ырӑ пулӑма хутшӑннӑ ҫынсене тав турӗ. «Андриян Григорьевич паттӑр ӗҫӗпе Чӑваш Ене мухтава кӑларчӗ, ҫав вӑхӑтрах хӑй те мухтава тухрӗ», - терӗ Михаил Игнатьев.
СССР летчик-космонавчӗн, авиацин генерал-майорӗн, СоветСоюзӗн икӗхут Ге-ройӗн кун-ҫулӗпе Шупашкар хулин хисеплӗ гражданинӗ И.Прокопьев паллаштарчӗ.
Уява ҫамрӑк космонавтсен отрячӗсем хутшӑнчӗҫ. Сумлӑ ентешӗмӗре халалласа вӗсем те сӑмах илчӗҫ. Тӗн училищин рек-торӗ Михаил протоиерей палӑка кӗлӗ туса пехиллерӗ.
Республикӑра хальхи вӑхӑтра А.Николаев ячӗпе тӗрлӗ мероприяти иртет. Ӗнер виҫҫӗмӗш космонавта халалласа унӑн тӑван тӑрӑхӗнче.Сӗнтӗрвӑрринче, митинг йӗркеленӗ. Ҫӗнӗ Шупашкарта вара ҫак кунсенче Валентина Терешкова ячӗпе Асӑну хӑми уҫнӑ. Ӑна Терешкова урамӗнчи пӗрремӗш ҫуртӑн мал енне вырнаҫтарнӑ. Асӑннӑ урам ҫак ята 1967 ҫулхи декабрӗн 12-мӗшӗнчетивӗҫнӗ. Валентина Владимировна пирӗн республикӑшӑн пӗрремӗш хӗрарӑм космонавт ҫеҫ мар, чӑваш кинӗ те. Вӑл 1963 ҫулхи июнӗн 16-мӗшӗнче тӗнче уҫлӑхне вӗҫнӗ. Ҫав ҫулах ноябрӗн 3-мӗшӗнче вара Андриян Григорьевичпа пӗрлешнӗ. Космонавтсен ҫемйинче Елена ҫуралнӑ.
В.ПЕТРОВА.