2011.08.20 Пенси укçине – палăк тума (Хыпар)

Республикăри ĕçпе вăрçă ветеранĕсен канашĕн прези­диумĕ чĕнсе каланине ырласа Патăрьел районĕнчи Упамса ялĕнчи Георгий Прокопьевич Васильев пенси укçин пĕр пайне Шупашкарта Андриян Николаев космонавт палăкне тума куçарса панă. Хальхи вăхăтра чăвашăн мухтавлă ывăлне чыслакан монумент валли укçа пуçтараççĕ. Ăна, тĕпрен илсен, халăх вăйĕпе çĕклеме палăртнă. Педагогика шур сухалĕ тивĕçлĕ канăва тухнă ытти пенсионера та çакăн пек утăм тума сĕнет.

Георгий Васильев Каншел ялĕнче çуралса ÿснĕ. Канашра учительсем хатĕрлекен инсти­тут пĕтерсен тата салтакра икĕ çул тăнă хыççăн Первомайски районĕн вĕрентÿ пайĕнче вăй хунă, комсомол райкомĕн пĕрремĕш секретарĕнче ĕçленĕ. Аллăмĕш çулсен вĕçĕнче шăпа ăна вăрман варринчи Упамса ялне илсе çитерет. Кунта вăл ачасене вырăс чĕлхи вĕрентет. Çакăнтах хăйĕн юратăвне тупать. Вăтăр та тултарман хастара 1964 çулта сакăр çул вĕренмелли шкул тилхепине тыттараççĕ. Çyp ĕмĕр хушшинче Упамса уншăн тăван ял пулса тăнă.

Николай Ларионов