Шупашкарта кĕçех тĕнче уçлăхĕн паттăрĕн Андриян Николаевăн палăкĕ уçăлмалла: вăл хатĕр ĕнтĕ, ăна вырнаçтармалли вырăнта юлашки ĕçсем пыраççĕ. Палăка лартма йышăнсанах республикăри тĕрлĕ ÿсĕмри çынсем Ветерансен общество организацийĕн ятарлă счечĕ çине хăйсен тÿпине хывма пуçларĕç. Канаш ертÿçи Алексей Скворцов пĕлтернĕ тăрăх - çурла уйăхĕн 22-мĕшĕ тĕлне унта пĕр миллион та тăхăр çĕр пин тенкĕ пухăннă. Сăвапла ĕç малалла пырать.
Алексей Васильевич сĕннипе тата ыттисемшĕн ырă тĕслĕх пултăр тесе нимене хастар хутшăнакансене хальхинче ятран асăнас тетпĕр. Чи нумай укçа хывакансен йышĕнче - Шупашкарти коопераци институчĕ /163 пин тенкĕ/, Елчĕк районĕнчи БТИ тата пасар /127 пин/, Шупашкар районĕнчи ветерансен канашĕ /124 пин/, Канаш хулинчи /64 пин/ тата районĕнчи /97 пин/ ветерансен канашĕсем, Етĕрне районĕнчи ветерансемпе уйрăм çынсем /64 пин/. 10 пинрен пуçласа 30 пин тенкĕ таран е ытларах та куçарнă предприятисемпе учрежденисем, банксем, организацисем, пĕчĕк тата вăтам бизнес ĕçченĕсем - вун-вун.
Уйрăм çынсем те, ытларах - ватăсем, хăйсен укçитенкине шеллемеççĕ. Йĕпреç районĕнчи Çакалах ялĕнчи Петр Николаевич Васильев, Красноармейски районĕнчи Николай Семенович Семенов, Шупашкарти Сарра Леонтьевна Баранова çыравçă - пилĕкшер пин, тĕп хуламăрта пурăнакан Надежда Афанасьевна Ефремова, Александр Амфианович Виноградов, Красноармейски районĕнчи Тусай ялĕнчи Петр Григорьевич Григорьев - виçшер пин, Вăрнарти Люция Изосимовна Ильина, Шупашкарти Галина Арсеньевна Дерябина, Валерий Григорьевич Николаевпа Борис Васильевич Михайлов пĕрер пин тенкĕ хывнă. Ульяновскри Д.В.Кузьминран 20 пин тенкĕ çитнĕ.
- Пархатарлă ĕçе хăйсен тÿпине хывнисене тав тăватпăр. Унта ыттисем те хастар хутшăнасса шанатпăр, - пĕлтерчĕ республикăри Ветерансен канашĕн ертÿçи. - Палăка нимелле хатĕрлесе вырнаçтарнине шута илсен - уйрăмах. Чылай ĕçе хальлĕхе кивçенле пурнăçланă. Парăма татас тесен тата чылай укçа пухмалла.
Юрий Степанов