2011.09.07 50 çула яхăн иртсен (Хыпар)

Тĕнчери пĕрремĕш хĕрарăм космонавтăн Валентина Терешковăн ячĕ пирĕн республикăра паян та сумлă янăрать. Чăваш халăхĕн кинĕ пулнипе кăна мар, хăй вăхăтĕнче Чăваш Енĕн аталанăвне пысăк тÿпе хывнипе те. Валентина Владимировна тĕнче уçлăхне парăнтарнă тата Андриян Григорьевич Николаевпа 1963 çулхи чÿк уйăхĕн 8-мĕшĕнче пĕрлешнĕ, 1964 çулхи çĕртме уйăхĕн 8-мĕшĕнче вĕсен хĕрĕ Алена çуралнă хыççăн Ярославль облаçĕпе Чăваш Республики хушшинчи туслă çыхăну вăйланнă. 1967 çулхи раштавра Çĕнĕ Шупашкарти пĕр урам пĕрремĕш хĕрарăм космонавт ячĕпе хисепленме пуçланă. /Темшĕн-çке халĕ те урам кăтартмăшĕсенче «Терешковă урамĕ» тесе çырнă/.

Раççей Космонавтикин çулталăкĕнче В.Терешкова ячĕллĕ урамăн пĕрремĕш çурчĕ çине Хисеп хăми çакрĕç. Ăна 1963 çулхи çĕртме уйăхĕн 16-мĕшĕнче «Восток-6» караппа тĕнче уçлăхне тухнă Валентина Терешковăна халалланă. Хисеп хăми çинчи виткĕçе Çĕнĕ Шупашкар хула пуçлăхĕ - хула депутачĕсен Пухăвĕн ертÿçи Олег Матвеев, ЧР Патшалăх Канашĕн депутачĕ Александр Васильев тата Чăваш парламенчĕн социаллă политикăн, сывлăха сыхлас тата физкультурăпа спорт комитечĕн ертÿçи Ольга Зайцева сирнĕ, чечексем хунă.

Хамăртан хушса çакна калар. Мускаври официаллă çăл куç пĕлтернĕ тăрăх - Совет Союзĕн Геройĕ, авиаци генерал-майорĕ В.Терешкова космонавт кĕçех Чăваш Ене килмелле. Юлашки хут пулнă хыççăн 50 çула яхăн иртсен...

Ю.Петров