2011.07.23 Вулавăшра - кĕçĕннисем (ЧĂВАШ ХĔРАРĂМĔ)

Раççейре тата Чăваш Енре космонавтика çулталăкĕ иртнĕ май тĕнче уçлăхне, унта хăпаракан паттăрсене халалласа республикăри районсемпе хуласенче тĕрлĕ мероприяти йĕркелеççĕ. Конкурссем, фестивальсем, куравсем хатĕрлессинчен вулавăшсем те пăрăнса юлмаççĕ. Етĕрнери ача-пăча библиотекинче “Çăлтăрсем патне талпăнса” викторина-курав уçăлнă. Тĕрлĕ автора халалланă ăна.

Патăрьел районĕнчи тĕп вулавăшра та нумаях пулмасть Андриян Николаева асăнса аса илÿ сехечĕ ирттернĕ.

Улатăр районĕнчи Алтышевăри тĕслĕх библиотекăра кĕçĕн классенче вĕренекен ачасене Раççей космонавтикипе паллаштарас тĕллевпе “Пĕлетĕр-и, епле вăл каччă пулнă!” вăйă программи йĕркеленĕ. Малтанах шăпăрлансене Юрий Гагарин пирки хатĕрленĕ презентаципе паллаштарнă, ун хыççăн ачасем “Космонавт шкулĕ” конкурсра тупăшма пултарнă.

Пăрачкаври район тĕп вулавăшĕнче те кĕçĕн çултисем валли “Инçетри те çывăхри космос” викторина хатĕрленĕ. Библиотека ĕçченĕсем пĕчĕк хăнасене космос карапĕсемпе çул çÿреве “илсе тухнă”, тĕнче уçлăхĕпе паллаштарнă.