«Пĕтĕм çĕр-шыв Юрий Гагарин тĕнче уçлăхне çĕкленнĕренпе 50 çул çитнине паллă тунă тата çăлтăрсен анлăшне парăнтарнисене чысланă çул пирĕн хамăрăн паттăра, ентеше Андриян Григорьевич Николаева тивĕçлипе хисеп тумалла».
Чăваш Республикин Президенчĕ М.Игнатьев.
Шăп та лăп 49 çул каялла, 1962 çулхи çурла уйăхĕн 11-мĕшĕнче, Андриян Григорьевич Николаев историре пуçласа ушкăнпа космоса çĕкленнĕ май çăлтăрсен анлăшне парăнтарнă. 8 çултан, 1970 çулхи утă уйăхĕнче, тĕнче уçлăхĕ ăна тепĕр хут парăннă: 17 талăк та 17 сехете тăсăлнă вĕçев çав вăхăт тĕлне чи вăрăмми пулнă.
Виççĕмĕш космонавт, Чăваш çĕрĕ çинче çуралнăскер, наци паттăрĕ кăна мар, пĕтĕм тĕнче пĕлекен тата юратакан çын пулнă. Ентешĕмĕрĕн тава тивĕçлĕ ĕçĕсене Раççейĕн тата ют çĕр-шывсен вун-вун наградипе палăртнă. Унăн хушаматне Чăваш Енĕн Ĕç Мухтавĕн тата Паттăрлăхăн Хисеп кĕнекине чи малтан кĕртнĕ. Андриян Григорьевич Николаев - пирĕн республикăн, Калуга, Каспийск, Махачкала, Нальчик, Ржев, Смоленск, Гюмри, Караганда, Дархан, София, Варна, Петрович, Плавен, Карловы Вары, Буир хулисен хисеплĕ гражданинĕ. Чăваш Енĕн çăлтăр ывăлĕн ятне Уйăхăн леш енчи кратера, Франц Иосиф çĕрĕн архипелагĕнчи пăр купола, Антарктидăри хысака, карапсене, нумай-нумай урампа шкула çамрăк космонавтсен отрядне панă.
Авăн уйăхĕн 5-мĕшĕнче СССР летчик космонавчĕ, авиаци генерал майорĕ, Совет Союзĕн икĕ хут Геройĕ, Чăваш Республикин хисеплĕ гражданинĕ Андриян Григорьевич Николаев çуралнă кун, Шупашкарта палăк уçма палăртнă. Космонавтика скверне тăвассине пуçармалли монумент пирĕн ентешĕн тĕлĕнмелле паттăрлăхĕпе çитĕнĕвĕсен символĕ пулĕ.
Культура композицийĕ - чăннипех халăх палăкĕ, мĕншĕн тесен ăна хатĕрлеме тата лартма кирлĕ укçа-тенке Чăваш Республикинче пурăнакансем çеç мар, Раççейĕн ытти регионĕнче тĕпленнĕ йăхташăмăрсем те пухаççĕ. Калăпăр, Ульяновскри пысăках мар предприяти ертÿçи Дмитрий Кузьмин 20 пин тенкĕ куçарса панă, Инçет Хĕвел тухăçĕнчи ветерансем 3 пин тенкĕ ытла пухнă. Çак кунсенче вара республикăри Ветерансен канашне Шупашкарта пурăнакан пенсионерка шăнкăравланă, хăй çÿрейменнине кура хваттерне укçа пырса илме ыйтнă.
Чăвашсен авалтан пыракан йăлипе йĕркеленĕ нимене, мухтавлă ентешĕмĕре чыслас ĕçе кашниех хутшăнма пултарать.
«А.Г.Николаев палăкне лартма - ырă кăмăлтан» тесе çырса тÿлев шучĕ çине çак реквизитсемпе укçа куçарма пулать:
Некоммерческая организация Фонд поддержки социальных и культурных программ Чувашии
Филиал ОАО Банк АВБ в г.Чебоксары
Р/с № 40703810600000000081
К/с. № 30101810800000000714
БИК 049706714
ОГРН 1032127013071