2011.06.22 Тивĕçлисене - наградăсем (Хыпар)

Республика кунĕ умĕн Правительство çуртĕнче чыслав иртнĕ - республикăн патшалăх премийĕсене тата Раççейпе Чăваш Енĕн патшалăх наградисене

панă. Вĕсене 35 çын тивĕçнĕ - тĕрлĕ професси çыннисем. Михаил Игнатьев Президент аллинчен награда илнисен шутĕнче механизатор та пур,

техника наукисен докторĕ те.

«Тĕп вырăнта - çынсем, вĕсен ăнăçăвĕсем, тăван республика аталанăвне хывнă тÿпе», - тенĕ Президент. Вăл кашни районпа хулара хăйсен ĕçне, тăван çĕре парăннă çынсем пуррине палăртнă. Михаил Васильевич Чăваш Ен МЧСĕн ĕçченĕсене тав тунă. Çак ведомство пуçлăхĕн пĕрремĕш çумĕ Герман Михайлов Паттăрлăх орденне тивĕçнĕ. Пушар хуралĕн ĕçченĕсене Аркадий Сапожниковпа Алексей Николаева медальсем илнĕ ятпа саламланă. ЧПУ профессорĕ Михаил Петров тата «Çеçпĕл» предприяти ĕçченĕсем - техника наукисем енĕпе паракан патшалăх премийĕн лауреачĕсем. Коопераци институчĕн ĕçченĕсем Галина Калинина тата Тамара Сильвестрова, РАНăн Философи институчĕн наука сотрудникĕ Вадим Розин социаллă аталанăва тĕпчесе çырнă монографипе гуманитари наукисем енĕпе паракан премие тивĕçнĕ.

«Элара» тĕп конструкторĕ Андрей Гуляев 34 çултах ЧР промышленноçăн тава тивĕçлĕ ĕçченĕн ятне илнĕ. «Çамрăк пулин те унăн рационализатор сĕнĕвĕсем темиçе теçетке, вĕсем экономика енĕпе миллион тенкĕ ытла усă кÿнĕ», - тенĕ Президент. Альбина Григорьева вара ял хуçалăхĕн тава тивĕçлĕ ĕçченĕн ячĕшĕн 1992 çултанпах тар тăкать темелле. Вăл Тăвай районĕнчи машинăпа ĕне сăвакан чи лайăх операторсенчен пĕри. Хуçалăхра 19 çултанпа ĕçлет. Пĕлтĕр кашни ĕнерен 5085 литр сĕт суса илнĕ. Иртнĕ çул çанталăк условийĕсем япăх пулнине пăхмасăр çак кăтарту виçĕм çулхинчен 760 литр нумайрах. «Çитĕнÿ вăрттăнлăхĕ ансат, - тет хĕрарăм. - Хăвăн ĕçне юратмалла».

Михаил Игнатьев наградăсене панă май пурне те çывхарса килекен Республика кунĕ ячĕпе саламланă, çирĕп сывлăх, ĕçре çĕнĕ çитĕнÿсем суннă.

К.Семенов.