Енчен те Андриян Николаев тĕнчере никам тума пултарайман, çав саманара Тăван çĕр-шывшăн чи кирлĕ ĕçе тăватă талăкра ăнăçлă вĕçленĕ хыççăн тăван халăха тав тума Шупашкара килнĕ куна хамăр куçпа курман пулсан ĕненмен пулăттăмăр-ши?
Шупашкарăн тĕп урамĕпе кăнтăр енчен анаталла шуса анать чечек кăшăлĕсем айне путнă уçă машина, ешĕл чечексен çĕмелĕ варринче чи илемлĕ чечек - чăвашăн Улăпĕ, аллисенчи чечек пуххисене çĕклесе чун хушнипе пухăннă çĕр-çĕр çынна ăшшăн саламлать, йăл-йăл куллипе, йăваш та сăпайлă сăнĕпе кашни çынна илĕртет. Унтан Ленин палăкĕ умĕнчи трибуна çине хăпарса тăрать те халăх тинĕсне хумхантарсах ярать. Савăнăçне ниçта чикейменнисем ян-янракан ята ушкăнăн-ушкăнăн кăшкăрмах пуçлаççĕ: Андри-ян, Андри-ян, Андри-ян!!! Ертÿçĕсем регламента пăхăнса космос паттăрне халăхран уйăрма пикенчĕç, анчах халăх кĕрленине шута илсе Улăпа темиçе хутчен те пире кăтартрĕç. Çапах та курса тăранаймарăмăр, çавăнпа питĕ кĕтетпĕр Андриян Николаев генерал палăкне.
Асăннă чи телейлĕ кун хыççăн çур ĕмĕре яхăн вăхăт иртрĕ, чăваш халăхĕн ывăлĕ кампа хутшăнмарĕ пулĕ, никамран та ютшăнмарĕ. Эпир те, Чăваш наци конгресĕн делегацийĕ, Андриян Григорьевичпа пĕрле Урал тăрăхĕнчи чăвашсем патĕнче эрне çÿренине ĕмĕрне те манас çук. Çавăнпа кашни чăваш космосра пурăннă пĕрремĕш этемĕн палăкне курма ĕмĕтленни тĕлĕнтермĕш мар. Тата «Хыпар» хаçат та хĕтĕртсех, çырусене пичетлесех тăрать. Тен, çавăнпах пулĕ палăка тĕлĕкре те курма пуçларăмăр: утатпăр пек Шупашкартан Шуршăл еннелле чăваш эрешĕсемпе илемлетнĕ хапха витĕр, тăватă картлашка çине асăрханса пусса космонавтăн пĕрремĕш вĕçевĕн кашни талăкне тав тăватпăр, унталла та кунталла куçăмăрсене чар уçса улăп урамĕн-аллейин икĕ енчи тăхăршар чипер йăмрисем чăваш ывăлĕн иккĕмĕш вĕçеври 18 кунне аса илтернине асăрхатпăр, йăмрасен хушшинчи 18 юпа çине вырнаçтарнă хĕрлĕ çăлтăрсемпе илемлетнĕ щит хăмасем космонавтсен командирĕн пурнăç çулĕпе кĕскен паллаштарнине сисетпĕр - тăван килĕ, шкулĕ, техникумĕ, Карели вăрманĕ, Фрунзе ячĕллĕ авиаци училищи, Жуковский ячĕллĕ çар академийĕ, космос карапĕ, сканфандр* Геройăн пĕрремĕш «Ылтăн Çăлтăрĕ», Геройăн иккĕмĕш «Ылтăн Çăлтăрĕ», Байконур, Кремль, ăсчах дипломĕ, хăй аллипе çырса кăларнă кĕнекесен виçĕ хуплашки /Встретимся на орбите, М., 1966* Космос - дорога без конца, Ч., 1974* Притяжение Земли, Ч., 1999/, 30 çул халăх депутачĕ пулнин палли, юратнă «Вĕç, вĕç, куккук» халăх юррин икĕ йĕрки. Космонавтпа пĕрле шăппăн юрласа вĕçĕпĕр те халăх сăмахĕсем çумне «Космосран таврăнсассăн аннÿ килĕнче выртса кан» тесе вĕçлĕпĕр. Ун хыççăн 18 картлашкапа Улăп тăпри çине улăхăпăр та генерал тумĕпе, регалийĕсемпе, карттусĕпе илемлетнĕ палăка ыталăпăр, чуп тăвăпăр, сĕртĕнсе илĕпĕр, чечек парнелĕпĕр...
Хăш енчен ун патне пымалла, ăçталла пăхмалла унăн... Ку евĕр ыйтусене комисси татса парĕ, вĕсем йышăннине эпир те йышăнма хатĕр. Анчах Андриян Николаева никампа та танлаштарма юраманнине пĕлсе тăратпăр. Иртнĕ самана космонавта чи чаплă музей парнелерĕ, хальхи самана космосран сассине панă чăваш ачине чаплă палăк комплексĕ парнелеме тивĕç. Пĕтĕм Европăна çăкăр çитернĕ чăваш халăхĕ /Чĕмпĕр кĕпĕрнин жандармери полковникĕ Маслов патшана хыпарланă тăрăх/ иксĕлми пуян, хăйĕн ывăлĕшĕн тем тума та хатĕрри паллă.
Ĕмĕтленни усăллă теççĕ. Тата тĕлĕк пурнăçланма пултарать текен те пур. Халăх вĕрентĕвне ĕненсе те хисеплесе çакна шансах тăратпăр.