2011.06.03 Тӗнче уҫлӑхӗ илӗртет (Ҫамрӑксен хаҫачӗ)

Раҫҫейри Космонавтика ҫулне халалласа Ҫӗнӗ Шупашкарти Юрий Гагарин ячӗллӗ тӗп библио-текӑра ҫамрӑк космонавтсен шкулӗ уҫӑлнӑ. Унта 1-3-мӗш классенче ӑс пухакансем тӗнче уҫлӑхӗн вӑрттӑнлӑхӗсене шӗкӗлчеҫҫӗ. Шкул йӗркелӳҫисем ачасене ҫӑлтӑрсем патне вӗҫнин пӗлтерӗшне уҫса параҫҫӗ, планетӑсемпе, паллӑ космонавтсен пурнӑҫӗпе паллаштараҫҫӗ.

Ҫак кунсенче вулавӑшра спутник хулари-9-мӗш вӑтам шкулти 2-мӗш класс вӗренекенӗсем пулнӑ. Ачасем вӑйӑсене, конкурссене хутшӑннӑ. Тӗнче уҫлӑхӗнчи вӗҫев евӗр ирттернӗ мероприяти шӑпӑрлансен кӑмӑлне кайнӑ. Ачасем виҫӗ экипажа уйрӑлнӑ: "Ҫӑлтӑр-9", "Марс-24", "Ҫӗр ҫинче пурӑнакансем". Библиотека ертӳҫи Тамара Аршинова  чи явапли   пулнӑ. Вӑл ҫамрӑк космонавтсене уҫлӑхра хӑюллӑ, туслӑ, чӑтӑмлӑ пулмаллине асӑрхаттарнӑ. Шкул ачисем Марс планета ҫине "анса" викторинӑна хутшӑннӑ. Унта "пурӑнакансемпе" пӳрнесемпе хускану туса калаҫнӑ, вӗсене Ҫӗр ҫинче пурӑнакан чӗр чунсемпе паллаштарнӑ.

Космос лабораторийӗнче пурин валли те ӗҫ тупӑннӑ: экипаж капитанӗсем планета ӳкернӗ вӑхӑтра ыттисем "космонавтика" сӑмахри сас паллисенчен ҫӗннисене шухӑшласа кӑларнӑ.

Вӑйӑ вӗҫленсен мероприятие пӗтӗмлетнӗ, ҫамрӑк космонавтсене Дипломпа чысланӑ. Вӗренекенсене пӗлӳ патне туртӑнма пулӑшнӑшӑн Татьяна Кондратьева педагога Тав ҫырӑвӗ панӑ.

Ольга ИВАНОВА.