2011.05.24 Паркран лайӑхрах вырӑн ҫук (Хыпар)

Ҫак калаҫӑва пуҫарса темӑна анлӑлатса пынӑшӑн «хыпарҫӑсене» ырламалла ҫеҫ. Андриян Николаев палӑкӗ мӗнле пуласси тата ӑна ӑҫта вырнаҫтарасси халӑха чӑннипех хумхантарнине туйса илтӗмӗр. Вӑл ахаль палӑк ҫеҫ мар вӗт-ха, пирӗн халӑхӑмӑрӑн мӑнаҫлӑхӗ. Ҫавӑнпа та палӑк эскизӗсен конкурсне малалла тӑсмалла, ӑна ӑҫта вырнаҫтарассине те халӑхпа канашласа татса памалла.

Калаҫӑва пирӗн те хутшӑнас, хамӑрӑн шухӑша палӑртас килчӗ: эпир палӑка Андриян Николаев космонавт ячӗллӗ ача-пӑча паркӗнче куратпӑр. Скульптура композицийӗ валли ҫак вырӑнтан лайӑхраххи ҫуках. Унта чӑннипех илемлӗ, территорийӗ анлӑ, клумбӑсем те, фонтан та пур. Тӗп хуламӑра ытти хула-районтан килекене ҫитсе курма, мухтавлӑ ентешӗмӗре пуҫ тайма меллӗ. Эпир сӗнекен вырӑн хулара пурӑнакансене те, республика ҫыннисене те туллин тивӗҫтерессӗн туйӑнать.

ПАГЕЕВСЕН ҫемйи.

Шупашкар  хули