2011.04.01 Вӗсем финала кӗнӗ (Ҫамрӑксен хаҫачӗ)

Ачасемпе ҫамрӑксен ҫут ҫанталӑка сыхлассипе ҫыхӑннӑ наука-тӗпчев тата вӗрену-ӑслӑлӑх проекчӗсен Пӗтӗм тӗнчери "Ҫын - Ҫӗр-планета - Космос" олимпиадине Чӑваш Енри шкулсенче пӗлӳ пухакансем ҫуллен хутшӑнаҫҫӗ. Икӗ ҫул каялла Шупашкарти 60-мӗш вӑтам шкул вӗренекенне Анатолий Левьева, пӗлтӗр Канашри 6-мӗш вӑтам шкул ачине Максим Волкова ЮНЕСКО Дипломӗпе чысланӑ.

"Ҫӑлтӑрсем" олимпиада финалне хальхинче Вӑрнар, Сӗнтӗрвӑр-ри, Ҫӗмӗрле районӗсенче, Ҫӗрпуре, Куславккара, Ҫӗнӗ Шупашкарта пурӑнакан ултӑ ҫамрӑк кӗнӗ. Вӗсем пурте - республика шайӗнчи ӑмӑртура мала тухнӑскерсем. Конкурсҫӑсен ӗҫӗсем те кӑсӑклӑ. Куславккари 2-мӗш вӑтам шкул хастарӗ Павел Львовский олимпиадӑна курав пӑрӑхне тӑратнӑ. Химиксен хулинчи 16-мӗш вӑтам шкулта пӗлӳ илекен Анжела Назарова "юр пӗрчи вӑрттӑнлӑхӗсене" тӗпченӗ. Ҫӗрпури 2-мӗш шкулта вӗренекен Ксения Елехинӑпа Сӗнтӗрвӑрри районӗнчи Хуракасси пӗлӳ ҫуртӗнче ӑс пухакан Артем Михайлов космонавтсен пурнӑҫӗпе пултарулӑхне тӗпчесе проектсем янтӑланӑ. Вӗсене ҫамрӑк космонавтсем Мускав облаҫӗнчи Королев хулинче иртекен пӗтӗмлетӳллӗ конференцире хӳтӗленӗ. Унсӑр пуҫне Чӑваш Ен маттурӗсене тӗнче уҫлӑхӗпе ҫыхӑннӑ мероприятисене, музейсене илсе ҫӳренӗ.