2011.04.09 Çăлтăрсем илĕртнипе (ЧĂВАШ ХĔРАРĂМĔ)

Ака уйăхĕн 5-мĕшĕнче Чăваш Республикин Наци библиотекин акт залĕнче “Çăлтăрсем патне хывнă çул” интернет-конференци иртнĕ. Ăна Раççейре космонавтика çулталăкĕ пулнă май йĕркеленĕ уйăхлăх иртнине тата Юрий Гагарин космоса хăпарни 50 çул çитнине халалланă. Мероприятие Чăваш Республикин Культура тата Вĕренÿ министерствисем, Шупашкарти А.Николаев ячĕллĕ 10-мĕш шкул йĕркеленĕ.

Тĕл пулăва хутшăннă çамрăк космонавтсен “Спейс” отрячĕн, Шупашкарти 10-мĕш вăтам шкул вĕренекенĕсемпе вĕрентекенĕсен, килнĕ хăнасен пĕр-пĕрне каласа памалли, сÿтсе явмалли тупăнсах тăнă.

Космоспа çыхăннă профессисен тĕлĕшпе кăсăкланакан яшсемпе хĕрсен ыйтăвĕсене Хусан авиаци институтĕнче вĕреннисен Чăваш Республикинчи ассоциацийĕн председателĕ Евгений Паршин хуравланă.

Конференцире Чулхулари планетари çумĕнчи “Притяжени” центра çÿрекен ачасем тата Ю.Гагарин ячĕллĕ 66-мĕш шкулта 11-мĕш класра вĕренекенсем çыхăну йĕркеленĕ. Шупашкарти хăнасене Гагарин ячĕпе пĕлÿ уявĕ йĕркеленине каласа кăтартнă. Чулхулари планетарире ĕçлекенсем хăйсен космосри пек вĕçме май паракан тренажер пуррине пĕлтернĕ. Ун пекки хальлĕхе пур çĕрте те çук иккен. Чулхуласем Чăваш Ен ачисене хăнана пырса йывăрăшсăрлăха туйма чĕннĕ.

Конференцие интернет урлă Çĕрпÿри 2-мĕш вăтам шкул, Çĕмĕрлери “Кондор” отряд та хутшăнма май тупнă.

Пухăннисем валли астрономипе тата космонавтикăпа çыхăннă видеоурок та йĕркеленĕ.