2011.04.09 Самантлăх тĕл пулу (ЧĂВАШ ХĔРАРĂМĔ)

1961 çулхи ака уйăхĕн 12-мĕшĕнче эпир, биологи факультечĕн пĕрремĕш курс студенчĕсем, психологипе лекци итлеме пуçтарăннăччĕ. Шăпах çавăн чухне Юрий Гагарин “Восток” караппа çĕр чăмăрĕ тавра вĕçсе çаврăнни çинчен хыпар сарăлчĕ. Тепĕр кун хаçатсенче пĕрремĕш космонавтăн сăн ÿкерчĕкне пичетлерĕç. Çак пулăм мĕнешкел хăпартлантарчĕ пире!

1962 çулхи çурла уйăхĕн 11-мĕшĕнчи савăнăçа та манман. Ун чухне каникул вăхăтĕнче тăван яла килнĕччĕ. Радиопа чăваш каччи Андриян Николаев космоса вĕçни пирки пĕлтерчĕç. Çак хыпар ĕçре те, вĕренÿре те ÿсĕм тума пулăшрĕ. Чăваш Енĕн мухтавлă ывăлĕ Шупашкара килни асран тухмасть. Ленин проспекчĕпе Карл Маркс урамĕнче çулăн икĕ енĕпе халăх йышлă пуçтарăннăччĕ. Космонавт утас çул çине чечексем хучĕç, хăйне те тĕрлĕ тĕслĕ çеçке çыххисем тыттарчĕç. Андриян Григорьевича И.Я.Яковлев ячĕллĕ педуниверситет умĕнче пĕрремĕш хут курни манăçман.

1963 çулта вăл мăшăрĕпе Валентина Терешковăпа Чăваш Ене килнĕччĕ. Ун чухне куç илмесĕр сăнанăччĕ çак мăшăра. Самантлăх тĕл пулу та пире, студентсене, хĕмлентерсе хăварчĕ.

Юлташсемпе пĕрле космонавт çуралнă тăрăха кайса килме тĕв турăмăр. Шуршăлпа çапла студент çулĕсенчех паллашрăмăр. Тавăтри вăтам шкулта ĕçлеме пуçласан та вĕренекенсемпе пĕрле Сĕнтĕрвăрри районне çитрĕмĕр, Андриян Николаевăн музейĕнчи кашни экспонатпа кăсăклантăмăр. Чăваш Енĕн мухтавлă ывăлĕ вĕреннĕ парта хушшине ларса пăхрăмăр, унăн тумтирĕпе, апат-çимĕçĕпе интереслентĕмĕр. Илемлĕ ялпа, пуян хуçалăхпа паллашма кунта пурăнакан пирĕн ентеш Анатолий Скворцов пулăшрĕ. Каярахпа та Шуршăлта темиçе хут пултăмăр.

Тивĕçлĕ канура килти вулавăшри Андриян Николаевăн “Тĕнче уçлăхĕнче”, “Вĕçĕ-хĕррисĕр уçлăхра” кĕнекисене тишкеретĕп. Вăл çуралнă ялта юлашки хут пулнăранпа 27 çул иртрĕ. Кăçал Космонавтика çулталăкĕнче Шуршăла тепĕр хут çитсе курасшăн.