Этем тĕнче уçлăхне пĕрремĕш хут вĕçсе тухнă кун паттăр професси çыннисем, наука прогресĕшĕн вăй хуракансем, ракетăпа космос отраслĕнче тăрăшакансем, хăйĕн ывăл-хĕрне çăлтăрсем патне ăсатнă халăхсем Юрий Гагарин уçнă çулпа утакансене савăк кăмăл-туйăмпа чысларĕç.
Пархатарлă çак ĕçре Чăваш Енĕн те тÿпи пысăк: вăл çитĕнтернĕ виçĕ Улăп çăлтăрсемпе «калаçнă». Тăван республикăмăрăн та, тĕпчевпе сăнавăн тĕрлĕ учрежденийĕнче ĕçлекен ентешсен те пайти пысăк. Çĕр-шывăмăрти тăватă космодромра та чăваш çĕрĕн пархатарĕпе вăй-хал илсе çитĕннĕ нумай наци çыннин çамрăк ăрăвĕ çар хĕсметĕнче тăрать. Казахстанри Байконурта уйрăмах нумайăн вĕсем.
Космонавтикăн 50 çулхи юбилейлĕ кунĕнче республикăри хуласемпе ялсенче савăнăçлă митингсем, ытти мероприяти иртрĕ. Шупашкарти Юрий Гагаринпа Андриян Николаев космонавтсен палăкĕсем умне Чăваш Республикин Патшалăх Канашĕн спикерĕпе депутачĕсем, Шупашкар хула мэрийĕн, тĕп хуламăрти районсен администрацийĕсен, республикăри космонавтика ветеранĕсен союзĕн Канашĕн яваплă çыннисем, Байконур космодром ветеранĕсем, çамрăк космонавтсен пĕрлĕхĕн членĕсем, вăтам тата аслă шкулсенче вĕренекенсем, общественноç представителĕсем йышлă пухăннă, чĕрĕ чечексем хунă. Пухăннисене Чăваш Республикин Президенчĕ Михаил Игнатьев паллă пулăмпа - çын тĕнче уçлăхне пĕрремĕш хут вĕçнĕренпе 50 çул çитнĕ ятпа ăшшăн саламларĕ. Михаил Васильевич Совет тата Раççей космонавчĕсен паттăрлăхĕпе наука-техника прогресĕнче çитĕнÿ хыççăн çитĕнÿ тунине, вăл вара халăхшăн, пурнăç аталанăвĕшĕн ĕçленине палăртрĕ.
Космонавтика кунне, унăн 50 çулхи юбилейне виççĕмĕш космонавтăн, мухтавлă ентешĕмĕрĕн çуралнă тăрăхĕнче те анлăн паллă турĕç. А.Г.Николаевăн Шуршăлти мемориал комплексĕнчи митинга республикăри пур районтан кăна мар, кÿршĕллĕ тăрăхран та, çĕр-шывăн ытти регионĕнчен килнĕ хăнасем те хутшăнчĕç. Михаил Игнатьев Президент Андриян Григорьевич ячĕпе çĕкленĕ часавая кĕрсе пуç тайнă тата чĕрĕ чечексем хунă хыççăн митинга хутшăннă çынсемпе тĕл пулчĕ, çамрăк космонавтсен отрячĕсенчи хĕр-упраçпа яш-кĕрĕмĕн ыйтăвĕсене хуравларĕ. «Çирĕп сывлăхлисемпе анлă тавра курăмлисем кăна палăртнă тĕллевсене пурнăçа кĕртме пултараççĕ, - терĕ Президент. - Пирĕн мăнаçланмалли, камран тĕслĕх илмелли, кам пек пулма тăрăшмалли ырă тĕслĕх пур. Вĕсем - Андриян Николаев, Николай Бударин, Муса Манаров. Пурте космонавт пулаймăпăр, анчах пирĕн ырă, тăван çĕр-шыва юрăхлă çын пулмаллах. Сирĕнте - пирĕн шанăç, ĕненÿ».
Шуршăлти СССР космонавт летчикĕн А.Г.Николаев ячĕллĕ мемориал комплексĕнчи мероприятисемпе пĕрлех çак кун Шупашкарти электрон тата кинодокументаци патшалăх архивĕнче студентсем валли «Космос ÿсĕмĕ - кинодокументсенче» темăпа семинар, республикăри çамрăксемпе ача-пăчасен библиотекинче «Этем. Тĕнче уçлăхĕ. Космос» акци, «6х7» галерейăра ачасен ÿнер ĕçĕсен «Çăлтăрсем патне хывнă çул» курав, Чăваш Енри çамрăк космонавтсен «Пире космос инçетлĕхĕ чĕнет» слечĕ, Шупашкар, Муркаш, Красноармейски, Çĕрпÿ тата ытти районти библиотекăсенче вулав сехечĕсем, шкулсемпе культура çурчĕсенче Паттăрлăх урокĕсем, конкурссемпе викторинăсем, спорт ăмăртăвĕсем иртнĕ.