25.04.2019 г. Хăнара- пултаруллă ушкăн «Ямаш Ен»

  Ака уйăхĕн  25-мĕшĕнче  Пысăк Енккасси    Культура ҫуртĕнче Чăваш чĕлхи кунне анлăн паллă турĕҫ.  Ял халăхне чаплă уявпа саламлама   Канаш районĕнчи Ямаш ял тăрăхĕнчи Людмила Константинова ертсе пыракан «Ямаш ен» фольклор ушкăнĕ килсе ҫитрĕ.  Курма пынисем ямашсен  пултарулăхĕпе тĕлĕнмеллипех тĕлĕнчĕҫ. Концерта Аслă Чак ялĕн каччи-хĕрĕсем те килсе   хăнасен    юрри-ташшипе, йăли-йĕркипе   паллашма кăмăл  турĕҫ. Репертуар чăннипех те пуян ямашсен. Ушкăнпа та   пĕчченшер юрланă юрăсем илемлĕн сасă пĕрпеклĕхĕпе чылайччен янăрарĕҫ ҫак каҫ  кунти сцена ҫинче.  Иван Семенов, Аркадий Краснов купасҫăсем улшăна-улшăна выляса пырса юрлакана хавхалантарса пычĕҫ. Купăс тӱмисем пултаруллă каччăсен аллинче тĕрлĕ вариацисем туса ҫепĕс кĕвĕсем янратрĕҫ. Галина Максимова, Дарья Михайлова(вăлах ташă кĕввисене параппанпа  ăста ҫапса  пычĕ),пĕр мăшăр Аркадийпе Зоя Красновсем, Владимирпа Галина Харитоновсем, Зоя Аристархова, Ольга Волкова, Елена Красновапа Оксана Семенова  юрланă чăваш, вырăс халăх юррисем чылайччен асра юлĕҫ куракан чĕринче.  Халăх инструменчĕсемпе вылянă чăваш кĕввисем те питех те ăнăҫуллă янăраса шăнкăртатса юхакан Энĕш шывĕпе пĕр саслă пулса Атăлах ҫитрĕҫ пулĕ.  Костюмсемпе те питĕ пуян «Ямаш ен» ушкăн. Тĕрри-ҫĕввисене хăйсемех тĕрлеҫҫĕ,иккен, ушкăна ҫӱрекенсем. Концертра тĕрлĕ шӱтсем пулни татах та пуянлатрĕ унăн пахалăхне.  Николай Семенов шӱт ăсти куракана  чылайччен  ахăллтаттарчĕ. Ирина Якимова  тухса калакан ертсе пынипе уяв каҫĕ пысăк шайра иртрĕ. Кашни юрринех енккассисем тăвăллăн алă ҫупса пахаларĕҫ. Куракансен ячĕпе Пысăк Енккасси Культура ҫурчĕн ĕҫченĕ Николай Гаврилов, Лилия Левская (Аслă Чак), Петр Яковлев (Карак Ҫырма ) «Ямаш Ен» ушкăна ҫӱрекенсене  чун-чĕрере ыра савăк кăмăл  вăратнăшăн  ăшшăн тав турĕҫ, пултарулăхра татах та пысăк ҫитĕнӱсем тума ырлăх-сывлăх сунчĕҫ.