16.11.2018 г. Чăваш юрăçисем Пысăк Енккасси ялĕнче

Пысăк Енккасси культура çуртне ял халăхĕ  чăваш юрăçисен  пултарулăхĕпе киленме пуçтарăнчĕç. Андрей Емельянов, Самар чăвашĕ, пухăннисене чăваш тата вырăс юррисене парнелерĕ. Вăл халăхра сарăлнă Нина Изедеркина сăввипе хăй  кĕвĕленĕ «Эп вĕрентĕм халăхран», Валерий Раштавăн «Пирĕн ăраскал» юррисемпе халăха савăнтарчĕ. Вăл  юрлакан тăванлăха, атте-аннене халалланă юрăсем те çынсене тыткăнларĕç.  Çĕрпÿ пики, Лариса Воронова, Э.Табаев хайланă «Таврăнсам», «Юрататăп сана», таса юрату, туслăх çинчен шăрантарнă юррисене куракансем вăйлăн алă çупса кĕтсе илчĕç.  Комсомольски районĕн яшĕ, Сергей Королевский, малтан «Янташ» ушкăнра юрланă. Хăйĕн илемлĕ сассипе çывхарса килекен Аннесен кунĕ ячĕпе саламласа  юрă парнелерĕ. Лидия Изекеева сăввипе Сергей хăй кĕвĕленĕ «Илемлĕ кĕреке» юрра залра ларакансем те пĕрле юрларĕç. Çапла вара, ял халăхĕ  ĕç хыççăн илемлĕ юрăсем итлесе, савăнса каçа ирттерчĕ,  артистсене  татах та творчествăлла çитĕнÿ тума сунчĕ.