Чăваш халăх юрри-ташшине анлă сул

                                Чăваш халăх юрри-ташшине анлă сул.

    Шупашкарти трактор тăвакансен Культура керменĕнче Республикăри Халăх пултарулăх центрĕпе Чăваш патшалăх культурăпа искусство институчĕн хушма пĕлӱ паракан факультечĕ «Илемлĕ чăваш кĕвĕ тĕнчипе  ырă йăла – йĕркене халăх хушшинче сыхласа хăварас, аталантарас» темăпа  Чăваш республикипе Раҫҫейри тĕрлĕ регионсенчен килнĕ фольклор ушкăнĕсен ертӱҫисен вĕренĕвне ирттерчĕ. Пушкăрт,Тутар республикисемпе Самар облаҫĕнчен килнĕ чăвашлăха чунтан парăннă фольклор ушкăнĕсен ертӱҫисем 90 сехетлĕ программăпа иртнĕ вĕренӱ  3 тапхăрпа иртнĕ. Йĕркелекенсем  вĕрентĕве  усăллă ирттерессишĕн тăрăшни самаях курăнать. Программăра режиссура, сасăсене тĕрĕс кăларса юрлама, республикăри тĕрлĕ этнографи ушкăнĕсенчи юрă-ташăсене вĕрентесси, паллă ушкăнсен пултарулăхĕпе паллашасси пулнă. Каҫкӱлĕм театрсемпе концерт залĕсенче проффесси коллективĕсен  ăсталăхне курса савăннă. Çавăн пекех чăваш халăх инструменчĕсене тăвакан ăстасем Н.А.Фомиряков тата В.А.Михайлов  чăваш халăхĕн вĕрсе, ҫапса каламалли, хĕлĕхлĕ инструментсемпе  тата вĕсене туса хатĕрлес енĕн хăш-пĕр вăрттăнлăхĕсемпе паллаштарнă. Раҫҫей культурăн тава тивĕҫлĕ ĕҫченĕсем чапа тухнă «Уяв» ушкăн ертӱҫи З.А.Козлова тата Шупашкарти музыка училищин вĕрентекенĕ С.Г.Лаврентьева чăваш фольклор юхăмне аталантарас енĕпе  уҫҫăн калаҫрĕс,  чăваш юррисен стилĕпе тата аранжировка тăвас енĕпе паллаштарчĕс. Семинар ĕсне  Вăрмарти Культура аталанăвĕн центрĕн «Парне» халăх фольклор ушкăнĕн купăсҫи В.Т.Архипов тата  Пысăк Енккасси Культура ҫурчĕн заведующийĕ Н.Н.Гаврилов хутшăннă. Пухăннисем Республикăри Халăх пултарулăх ҫурчĕн методистне С.В.Тяхмусована - чăн-чăн чăвашлăхшăн ырми-канми  тăрăшакана  ăшшăн тав турĕҫ.

                                                                                                                                Н.Гаврилов.