Январĕн 12-мĕшĕнче Тури Туçари спорт залĕнче ял тăрăхĕн Кубокне çĕнсе илессишĕн мини-футбол турнирĕ иртрĕ. Унта Туçаран икĕ команда, Кивĕ Ахпÿрт, Анат Туçа, Çĕнĕ Ахпÿрт ялĕсенчен спортсменсем хутшăнчĕç.
Спортсменсемпе курма килнисене Туçа ял тăрăхĕн пуçлăхĕ Константин Углев,районти депутатсен Пухăвĕн депутачĕ Петр Перепелкин, ял тăрăхĕнчи Ддпутатсен Пухăвĕн ертÿçи Петр Шашкин, ветерансен хушшинче спорт мастерĕн кандидачĕн ятне тивĕçнĕ Валерий Салмин саламларĕç, ăнăçусем сунчĕç.
Ăмăрту питĕ хĕрÿ иртрĕ. Спортсменсем хăйсен ăсталăхне туллин кăтартрĕç. Хĕрÿ кĕрешÿре Тури Туçан пĕрремĕш команди мала тухрĕ. Иккĕмĕш команди те унран юлма шутламарĕ – пьедесталăн иккĕмĕш картлашки çине хăпарма пултарчĕ. Виççĕмĕш вырăна Анат Туçари хастарсем тухма пултарчĕç. Хастаррисенчен хастаррисене уйрăммăн палăртрĕç. «Чи хаклă вылявçă» ята Çĕнĕ Ахпÿрт каччи Александр Кротов тивĕçрĕ. «Чи лайăх хÿтĕлевçĕ» Владимир Давыдов (Туçа), «Чи лайăх вратарь» Константин Перепелкин (Анат Туçа), «Чи лайăх тапăнса вылякан» Константин Глинкин (Туçа) тесе палăртрĕç жюри членĕсем.
Людмила Каргина хăй ятĕнчен Павел Кузнецова «Çĕнтерÿшĕн талпăнакан» номинаципе укçан парса хавхалантарчĕ.
Вылякансем хăйсем те парăмра юлас мар терĕç: Шупашкарти ял хуçалăх академийĕнче физкультура предметне вĕрентекен Виталий Глинкина «Чи лайăх судья» ята парса чысларĕç.
Турнира йĕркелесе ирттерме пулăшнă Павелпа Юрий Рубцовсене, Эдуард Петрова, Павел Кузнецова, Виталий Глинкина, Евгений Майорова, Людмила Каргинана тав тăватпăр, çирĕп сывлăх сунатпăр.