2017.08.03 Пур тăвансем пухăнсан!

Туслăхра вăй, тăванлăхра хăват тенĕ мĕн ĕлĕкрен. Пĕр пĕринпе юлташлă, хурăнташлă пурăннине мĕн çиттĕр. Туссемпе тăвансем пулсан эпир кашнийĕшех пуян! Шăпах çакна тĕпе хурса Патăрьел районĕнчи Аслă Арапуçсемпе Вăрмарти Арапуçсем илен кунĕнче тăванла тĕл пулу ирттерчĕç. Миттапа Анатри ялĕнче пухăнса пĕр-пĕрин хушшинчи çыхăнусене тата та çирĕплетрĕç. Туслăх уявĕ курма килнисене мĕн чухлĕ телей парнелемерĕ-ши? Çак кун хăнасене юрăпа-ташăпа кĕтсе илнĕ хыççăн икĕ ялăн пуçлăхĕсем С. А. Никитинпа А. Г. Агеев, шкул директорĕсем В.С. Чернышевпа К. А. Васильев, паллă çыравçă Татьяна Дорофеева-Миро, çак пулăмăн йĕркелÿçисем Н. И. Петровапа Р. Р. Ефимова тата ыттисем те саламларĕç.
Унтан мероприяти Арапуç пики шоу-конкурспа пуянланчĕ. Кунта икĕ пĕр пек ятлă ялтан виçшер илĕртуллĕ та илемлĕ хĕрсем хутшăнса хăйсен пултарулăхĕпе паллаштарчĕç. Конкурс хĕрÿ тупăшура иртрĕ. Пикесем чăннипех маттур та ăста пулнипе куракансене тĕлĕнтермеллипех тĕлĕнтерчĕç. Кашнийĕшех хăйне майлă пултаруллă.
Тÿресем пĕтĕмлетĕвĕ тăрăх вара хăюллă пике–Галина Яковлева, сăпайлă пике- Светлана Степанова, кăмăллă пике–Луиза Васильева , чăнкă пике–Марина Кузьмина, вице–Арапуç пики Ирина Димитриева пулса тăчĕç. «Арапуç пики» тĕп номинацине Аслă Арапуç тăрăхĕнчи Сител хĕрĕ Ирина Лякова çĕнсе илме пултарчĕ.
Уявра конкурс хыççăн спорт вăййисем иртрĕç. Хăнасемпе кил хуçисем волейболла тата тенисла выляса ăмăртрĕç. Пурте спортсменсен ăсталăхĕсене курса вĕсене хавхалантарса тăчĕç. Тупăшусенче: волейболла Аслă Арапуçсем, тенисла Арапуçсем вăйлăрах пулчĕç. Юрласа-ташласа, вăйă выляса савăннă хыççăн пурте пĕр шухăшлăн пулса çавра сĕтел хушшинче ăшшăн-ăшшăн калаçса, малашне те çакăн пек тĕл пулусене тăтăшрах ирттересси пирки килĕшсе чейпе сăйланчĕç. Катаран каç килсен çеç икĕ хаклăран та хаклă тăван ял çыннисем уйрăлас килменрен часрах тепре курасчĕ тесе пĕр пĕринчен уйрăлчĕç.