2017.07.17 Сителсенче - такапа кубок!

  Пурнăçра чи хакли вăл – сывлăх. Сывлăхлă пулас тесессĕн вара спортпа туслă пулмалла. Сител ялĕнче çакна питĕ аван ăнланаççĕ. Кунта ватти-вĕтти пĕр ÿркенмесĕр спорта мала хурса унăн тĕрлĕ енĕпе интересленеççĕ. Чи пултаруллисем вара ăмăртусене хутшăнса усĕм хыççăн ÿсĕм тăваççĕ.

    Акă Питрав кунĕнче Каншелĕнчи ял уявĕнче те пирĕн волейбол команди чи маттури те пултарулли, вăйли пулса тăчĕ. Çак тăрăхри сумлă та хисеплĕ ял-хуçалăхĕнче нумай çул тивĕçлĕн вăй хунă бригадир Н. В. Федоров ячĕпе ывăлĕсем йĕркелесе ирттернĕ турнирта сителсем пĕрремĕш вырăна тухрĕç. Чи хаклă парнене – такана– çĕнсе илме пултарчĕç. Çавăн пекех вĕсене пин тенкĕ укçа тата кубок парса хавхалантарчĕç.

   Чăннипех Алексей Шайманов ертсе пыракан команда чи вăйли те маттурри. Вĕсем, Николай Мамуткин, Илья Хомуткин, Александр Вариков, Василийпа Анна Реймовсем (турнира хутшăннисем), пиллĕкĕн çеç пулсан та (ытти командасем ултшарăн) волейбол вăрттăнлăхĕсене çирĕп пĕлсе вылянине кура, ăсталăхĕ çÿллĕ шайрипе мухтав хăмин пĕрремĕш картлашки çине хăпарма пултарчĕç. Каласа хăвармалла: ушкăнри хĕр пĕрчи çиччĕмĕш класс кăна пĕтернĕ. Çапах та вăл аслă пиччĕшĕсемпе пĕр тан выляса, пĕр йăнăш тумасăр мечĕке парăнтарма вăй-хăват çитерчĕ.

    Çак спортсменсем тĕлĕнмелле пултаруллисем. Кăçал çеç вĕсем Сител ял ятне çÿле çĕклесе тĕрлĕ тупăшура ултă малти вырăна тухма пултарчĕç. Мĕнех эпир вĕсене тăван ентешĕсемшĕн тăрăшнишĕн чунтан тав тăватпăр, малашне те çитĕнусем тума сунатпăр.